Shillong: Ka Shillong Lajong ka la pynliem ia ka Rangdajied United FC da 4-2 kol ha ka jingiakhun kaba long myn hynnin ka sngi ha ka lympung ka Shillong Premiere League ka SSA kaba long ha madan JN Stadium.
Ha ka jingiakhun, ka Rangdajied ka la ioh ban pynkhih jar nyngkong ha ka kyllastep ha ka 6 minit lyngba u A. Z. Mawthoh. Hapdeng ka jingshah thep, ka Lajong ka la ialehkai kham jai jai khlem duh mynsiem eiei.
Ka pali jongka, ka la wan jia ha ka kyllamiet ha kaba ka la ioh ban kynjat da ka shut bol ne ka penalty ba la kynjat da u Sheen Sohktung ha ka 52 minit. Hynrei ka Rangdajied United kala ioh biang ban knieh nam tam lyngba u S. Nongrum ha ka 61 minit.
Hapdeng ka jingiakhun, ka Lajong ka la iakhun kham satar bad ha ka 71 minit, ka la lah ban pyniakhaid biang lyngba u Samuel Lalmuanpuia.
Hadien kane shen, ka Lajong ka la ioh biang ban pynphai da u Novin Gurung ha ka 76 minit ban pyllong ia ka Lajong ban knieh nam tam 3-2. Kane ka jingioh thep biang ka Lajong,ka la pyndiaw mynsiem ia ka Rangdajied United bad shen hadien kane, ka la ioh biang ban thep da u Samuel 84 minit ban pynmih jingkhein 4-2 kol.
Ka Shillong Lajong ka la khur syndon 3 point bad kan iakhun biang ha ka 10 tarik Nailur pyrshah ia ka Nangkiew Irat.