Pynkynmaw ka KSU, ba dap 1 snem ka jingiap ki 5 ngut ha Mukroh

Shillong:Ka Khasi Students Union (KSU) ha ka sngi Balang, ka la pynkynmaw ïa ki paid nongshong shnong ka Jylla ïa ka jingdap shisnem ka jingshah siat ïap ki san ngut ki paidbah ba lui lui ha ki Pulit ka Assam ha Mukroh, West Jaiñtia Hills.

Ka KSU kum ka dak ban kynmaw sngewlem ïa kane ka sngi, ka la pynïeng ïa ki flex bad ki banner ha kylleng ki jaka jong ka Nongbah Shillong ban pyntip sha ki paidbah ba ka jingjia Mukroh ka la dap shisnem pura mynta ka sngi ka 22 tarik Naiwieng.
Ka KSU ka la pynïeng ïa ki banner ha ki jaka ba marjan ka Main Secretariat, Mot Kiang Nongbah ba marjan ka Shillong Civil Hospital, ha Khyndai Lad, Motphran, Laitumkhrah Square bad ha ki thaiñ Golflink.
Katto katne na ki banner ki don ïa ka jingthoh ba ong “Ka Mukroh ka dang dei ka jaka jong ka Meghalaya!!! Assam keiñ noh ïa ka jingkyntur pud”, “Shisnem kynthih la dap hadien ka jingshah pynïap dusmon ki para Khasi ha Mukroh. Ka Sngi kaba dum ïa ka Jaitbynriew”.

Haduh hynriew ngut ki briew ki la ïap bad arngut ki la mynsaw jur ha ka jingther kuli jong ki Pulit ka Assam ha ka step 22 tarik Naiwieng 2022 ha Mukroh, West Jaiñtia Hills.
Kane ka jingjia, ka la jia na ka jingwan rung ki Pulit ka Assam bad ki Pulit ka Tnat Forest ban kem ïa kawei ka kali kit dieng na Mukroh.