Pynkylla nongtrei pura ka sorkar ia 9 ngut ki nongtrei shipor ka Veterinery

Shillong, 06 Lber:
U Myntri ba peit ia ka tnad ri jingri, u Bah HDR Lyngdoh u la ong ba ki don 9 ngut ki nongtrei shipor (adhoc) jong ka tnad Animal Husbandary and Vetrinery ka jylla, kiba la rai ban pynlong kum ki nongtrei ba pura (regular).
Haba jubab ia ka jingkylli ba la wanrah da u MLA ka West Shillong Bah Paul Lyngdoh mynta ka sngi hapoh ka iing dorbar, u Bah HDR u la ong ba ia kine ki 9 ngut ki nongtrei la phah da ka tnad Veterinery sha ka tnad Personel ba kan ai ia ka jingmynjur ban pynlong kum ki nongtrei ba pura. Hynrei haba kylli biang shaphang katno por kan slem bad mynta ka tnad ka la phah ia ka jingthoh sha ka tnad Personel,u Bah HDR Lyngdoh um shym la lah ban jubab namar ba um tip. Hynrei u la kular ban wanrah ha kaba iadei bad kane ka jingtip hapoh kine ki sngi ba long dorbar.
Na ka liang u Bah HDR Lyngdoh u la ong ba ka sorkar ka la pynduh ia ka jingthung kontrak ha ki tnad sorkar hynrei ia kine ki 9 ngut la thung naduh kham mynshwa. Na ka liang u Myntri Rangbah u Dr Mukul Sangma uba bynrap halor kane, u la ong ba ha ka jingshisha ka sorkar ka la pynduh ia ka jingthung adhoc ha ki tnad sorkar bad ia kane la leh da ki sorkar ba na khmat hynrei kumba a paw, kane ka kam kam shym la trei kam satia namar ba ka jingthung adhoc ne kontrak ka la nang iaid haduh kine ki sngi.
“Ka sorkar kan pynduh noh ia ka jingthung kam adhoc nangne shakhmat”, la ong u Myntri Rangbah. U la ong ba ym shym la ioh jingtip kaba thikna naduh mynta ka sorkar ka la pynduh ia ka jingthung kam da ka adhoc namar ba ia kane ka kam, la leh da ki sorkar bapher bapher kiba la synshar ha ki snem ba la dep.