Pynkylla ka sorkar ia ki kyndon ka MLA skhim

Shillong, 31 Risaw:
Ka sorkar jylla ka la pynkylla ia ki kyndon ka MLA skhim da kaba mana ba ki MLA kim dei shuh ban ai jingiarap ia ki kynhun Balang ban thied tiar thied tar kum ki sur pynsawa, tiar shet, ki komputer.
Katkum ka kyndon ba la pynmih da ka State Level Committee ba la khlieh da u Myntri Rangbah ka jylla u Dr Mukul Sangma, ka jingialang kaba 19 tarik Risaw, 2016, ka la shim ia kane ka rai ban buh ia kane ka kyndon ban mana ia ka jingai jingiarap ba iadei beit bad ki kam Balang da ka MLA skhim ia ki kynhun Balang.
“Ki kam kum ka jingialehkai, ki kam tamasa, jingrwai, ki rii dustur kiba iadei bad ki kam niam, ym shah shuh ban mang na ka MLA skhim”, la rai ka jingialang, lait noh tang ia ki skul.
Haba iakren bad ki katto katne ki MLA, ki la pynpaw ba kane ka jingleh ka sorkar ki la pynpaw ia ka jingbym iahap ia kane ka jingleh kane ka sorkar namar ba ka la pynduh kynsan kynsan ia kane ka bynta.
Ym tang kane, ka sorkar ka la pynduh ruh ban mang pisa ia ki jingtyrwa ba la phah da ki MLA na ka Construction of Rural Road Programme (CRRP) skhim kaba dei na ka MLA skhim.
Kane ka jingpynduh ka sorkar, ka la pynbitar ia ki MLA khamtam kiba dei na ka liang pyrshah, kiba la kynnoh ba ka dei ka jingleh mon ka sorkar khlem ka jingiathir shwa.
“Bun ki MLA kiba la dep phah ia ka CRRP skhim hynrei ka sorkar ka la pynduh khlem mang pisa satia”, la ong ki MLA haba iakren halor kane.
Ki dkhot jong kane ka State level committee ki long u chairman u Dr Mukul Sangma, u myntri C&RD Bah Sniawbhalang Dhar, u myntri PHE Bah Prestone Tynsong, u myntri PWD u MM Danggo, u additional CS u T Tsering, u Principal Secretary u RM Mishra, ka RV Suchiang, Secretary IR Sangma, ka MN Nampui bad ka DD Sangma director ka Housing.