Pynkylla ka sorkar ia ka kyndon ka ain kyiad ban kyntiew khajna

Shillong: Ka jingialang ka kynhun myntri mynta ka sngi, ka la mynjur ia ka jingpynkylla ia ka Meghalaya Excise Rules na ka bynta ban kyntiew ia ka jingioh lum khajna ia ka jylla.

U Myntri rangbah ka jylla u Conrad K Sangma hadien ba la wai ka jingialang mynta ka sngi, u la ong ba ka sorkar ka la rai ban pynkylla ia ka Rule 3 sub rule (2) ka Meghalaya Excise Rules ban khang lad ia ka jinglait ei ka khajna na ka kyiad.

U la iathuh ba shwa ban wanrah ia kane ka jingpynkylla, katkum ka Rule 3 sub Rule (2), ki kudam kyiad kim siew khajna bad ruh ka jingsiew haba ki thied na ki kompeni.

“Ka jingsiew la shim haba ki die na ki kudam sha ki nongthied khutia. Kiba buh kudam kin thied na ki kompeni bad hadien kata, haba ki die khutia ki siew katkum ka jingthied mar “, la ong u Conrad.
U la ong ba na ka T.227 klur ka jingioh khajna na ka kyiad man u snem, kumba 90 percent kane ka khajna ka wan na kane.
“Ngi la pynkylla ia ki kyndon bad ka la donkam ia kiba thied ban siew lypa, kin hap ban siew khajna haba ki thied kyiad na ki kompeni”, la ong u myntri rangbah.
U la ong ba ia kane la leh ban pynthikna ban nym lait ei ka khajna ban pynsngaid ia ka iarong pisa ka jylla.
U Conrad u la ong ba da kane ka jingpynkylla, ka jylla kan kamai khajna kumba T. 40-50 klur shi snem na ka kyiad.
Ha kajuh ka por, ka sorkar kala rai ban pynjari da ka jingsiew kaba T. 2 tyngka haba ki sei ia ki kyaid na ki kudam.
U Myntri rangbah u la ong ba mynshwa ki nongkhaii ki rejister bad ki siew ia ka khajna bad ki sa thied ia ka challan bad ia kane ka rukom la pynduh noh.
“Mynta lada kim siew, kin don kiwei ki lad, bad ngi la kynthup ba ki dei ban siew haba ki sei na ki jaka buh kaba long 2 tyngka shi synduk. Kan kyrsoi ban pynmih khajna T. 60-70 lak na kaba ju ioh mynshwa” la ong u Conrad.
U la ong ba ka sorkar ka la rai ban lum khajna na ka kyaid kaba pyniaid bad thied ruh da ki shipai.
Katkum ka jingong u myntri rangbah, ki shipai ki pyndonkam ban thied kyiad na Narangi ha Assam hynrei ka tnad Excise kam shym la oh dor eiei na ki bad la rai ba 40 percent dei ban pynhap ha ka khajna kaban kyntiew shuh ia ka jingioh khajna sha ka T. 1-1.5 klur ha ka shi snem.