Pynkut ka HNYF ia ka jingrakhe 20 snem

Shillong,12 Iaiong:
Ka Hynniewtrep National Youth Front (HNYF) ka la pynkut noh ia ka jingrakhe 20 snem jong ka mynta ka sngi ha Khasi National Dorbar Hall. Katei ka seng ka la sdang ban rakhe ia ka jingiaid lynti ba 20 snem jong ka naduh ka 12 tarik u Lber, 2016 bad la pyn kut noh mynta ka sngi bad ha katei ka sngi pynkut la khot kyrpang ia u bah Julius Dorphang MLA ka Mawhati ba un long kum u kongsan katba u symbud kongsan pat la khot sngew bha ia u bah Samuel Jyrwa, Chairman NESO uba dei ruh u President barim ka KSU. Hynrei baroh ar ngut kitei kim shym la wan ha katei ka prokram ba la pynbeit da ka seng HNYF.
Kiwei pat kiba la shah khot sngewbha ha katei ka jingrakhe pynkut 20 snem kumba la pynbeit ha ka prokram ki long u bah Bipul Thangkhiew President RBYF, bah Robertjune Kharjahrin General Secretary HYC,bah Daniel Khyriem President KSU, bah Joe Marweiñ President FKJGP hynrei kitei baroh kim shym la poi ha katei ka prokram lait noh u bah Joe Marweiñ ka FKJGP. Nalor ki nongkren kiba pher bapher ba la kren ha katei ka jingialang ka la don ruh ka jingsam khusnam ia ki nongjop ha ki jingiakob bapher bapher hapdeng ki khynnah skul bad kiwei pat ki khusnam nam jop, la don ruh ki jingrai jingshad kiba la pynshongshit ia katei ka prokram.
U President jong ka HNYF u bah G.H Kharshanlor haba kren ha katei ka jingialang u la ong ba ha ka jingiaid lynti kaba 20 snem jong ka HNYF ki dkhot bad ki nongialam katei ka seng ki la ia kynduh ia kiba bun ki jingeh bad ki hap ban iaid lyngba kiba bun bah ki rai eh raidam ban ia khun na bynta ka ishu jong ka jaitbynriew bad don na ki ishu kiba la lah ban pyndep hynrei kiba bun hi ki ishu u la ong ba ki sahkut haduh mynta ruh. “Hynrei ka mynsiem len lade kan ym kut noh tang ha ka jingrakhe dap snem, ai ba ka jingialeh kan iaid beit” ong u bah G.H Kharshanlor uba la ong ruh ba kane ka juk stad mynta ka ri bad ka jaitbynriew ka donkam ban ia khun da ka thma jong ka bor ka jingpyrkhat. Ia katei ka prokram la pyniaid da ka kong Daiabianghun Kharwanlang, Lecturer bad la kren pdiang sngewbha da u bah Livingstone Thangkhiew (General Secretary barim katei ka seng), kiwei pat kiba la donlang ki kynthup ia u bah Sadon Blah.