Shillong: Hadien ka jingrisaiñ noh u bah Ardent M Basaiawmoit na ka kam President bad hadien ka jingrisaiñ jong kiba bun ngut ki dkhot CEC jong ka seng HSPDP, mynta ka sngi u President ba shipor jong katei ka seng u bah K.P Pangniang u la lum ia ka jingialang CEC ban pyrkhat na ka bynta ki kam ba katei ka Party ka hap ban iaid shakhmat.
Haba kren sha ki nongthohkhubor hadien ba la wai katei ka jingialang u bah K.P Pangniang MLA barim ka Rambrai u la ong ba la lum ia katei ka jingialang ban ia kren ia ka jingpynkhreh katei ka seng ban rakhe ia ka jingdap 50 snem jong ka bad kumjuh ban ia kren na ka bynta ka elekshon MDC ka ban sa long ha u snem ban wan bad ba jied ruh ia ki nongkitkam ba pura jong ka.
U Bah Samlin Malngiang, U bah KP Pangniang bad U bah Witting Mawsor, haba kren sha ki kotkhubor ha ka Sngi Balang:Rupang
U la iathuh ba ka HSPDP ka la jied ia u bah Samlin Malngiang uba dei ruh u myntri ka tnad PHE ba un long kum u Chief Organiser u ban peit ia ka jingpynkhreh katei ka seng ia ka elekshon MDC. Ka CEC ka la thung ia u bah Renikton Lyngdoh Tongkhar MLA ka Mawkyrwat kum u General Secretary jong ka, la jied ia u bah Panbor Ryntathiang kum u Joint Secretary bad ia u bah Manstudy Nongrem MDC ka Langrin kum u Finance Secretary.
U bah Pangniang u la iathuh ba katei ka seng kan rakhe ia ka jingdap 50 snem jong ka ha u naiwieng bad nohprah bad ka la pynkhreh ban pynkupburom ia baroh ki riew rangbah kiba la ia don bynta ha ka jingiakhih Hills State. Shuwa katei ka jingrakhe u la ong ba katei ka seng kan tei pyndep noh ia ka ophis ba pura jong ka. Haba phai sha ka elekshon MDC u la ong ba katei ka seng ka la pynkhreh ban pynieng kyrtong ym tang ha KHADC hynrei ha JHADC ruh.