Pynkup burom samla pule ka St.Edmund’s

Shillong, 10 Naitung:
Ha ka 9 tarik u ‘Nai tung 2015, ka St. Ed mund’s College ka la pyn kup burom ïa ki 83 ngut ki samla kiba la wan sha khmat ha ka resol jong ka under graduate course kaba la dep. Ha kane ka sngi la ïadon lang u Bah P BO Warjri, u Chief Secretary, ka jylla kum u Kongsan bad u Bah M. Kharkrang, u Superintendent Police ka East Khasi Hills kum u Symbud Kongsan. La sam ïa ki khusnam ryngkat ki sertiphiket bad ka pisa sha ki samla kiba la pas bha.
Ha ka jingkren jong u kum u Kongsan, u Bah PB O Warjri, u la ai khublei kyrpang ïa ki samla kiba la pass bha ha ki eksamin kiba pher bad u la pynshlur ïa ki ban nang ïai kiew shakhmat. U la khot bad kyrpad ruh ba kito ki samla ki bym shym la poi sha khmat hynrei kiba la pyrshang ba kim dei ban duh mynsiem hynrei ban nang ïai minot ha kiwei pat ki kyrdan pule.
U Bah M. Kharkrang ha ka jingkren jong u u la kyntu ïa ki samla ban nang ïai minot bad u la maham ruh ba haba ki thmu ban bteng ïa ka jingpule ki dei ban husiar bad wad bniah tang ïa ki jaka pule kiba thikna bad kiba la ithuh da ki bor kiba dei peit ïa ka pule ka puthi. U pynshlur ïa ki samla ban pyndonkam ïa ka social media hynrei da ka jinghusiar. U ong ruh ba ki samla ba ki dei ban husiar ba kim dei ban ngat ha ki kam ki ban ktah ïa ka jingpule jong ki kham tam ha kaba ïadei bad ka aiñ.
U Dr. Sylvanus Lamare, ha ka jingkren jong u kum u Principal u la pynpaw ba ha St. Edmund’s College mynta kiba bun ki samla pule ki dei kiba wan na ki thaiñ nongkyndong bad kum ka College ka sngewkmen ban lah ban noh u synniang sha ki samla na nongkyndong. Ka resol jong ka 2015 ha ka jingpas jong ki khynnah ka la kot sha ka 94% ha baroh ki 12 tylli ki department, kata 8 ha ka science bad 4 ha ka Arts ki la ïoh ïa ka jingpas kaba shispah na ka shispah. Kane ka la lah ban urlong namar ka jingïatrei lang kaba jur hapdeng ki nonghikai bad ki samla pule bad ka jingkloi jong ki nonghikai ban pynlut por na ka bynta ki khynnah. Ha kane ka sngi la ïadon lang ruh ki kmie ki kpa bad ki ba ha ïing ha sem jong ki samla kiba la pas bha, ki brother ka St. Edmund’s ryngkat ki nonghikai bad ki samla pule jong ka College. La pynshong shit ïa kane ka sngi da ki jingrwai na ki samla pule. Ïa ki kyntien pdiang burom la ai da u Prof. M. Chakravarty bad ki kyntien khublei da i Prof. I. Rynjah.