Pynkup burom ka Soil & Water Conservation, ia ki 18 ngut ki samla kiba la dep ia ka jingshah pyntbit na CTI Byrnihat

Nongpoh: Shi bynta ban ai mynsiem ne ban pynshlur ia kito ki samla kiba la pyndep ia ka Training kum ki Field Assistant hapoh ka Conservation of Training Institute kaba don ha Byrnihat, hynnin ka sngi na ka liang ka Soil and Water Conservation ka sorkar jylla, ka la pynkup burom ia ki 18 ngut ki Field Assistant kiba la dep ia ka jinghikai ha ka 48th Batch Field Assistant na Conservation of Training Institute Byrnihat.

Ha katei ka sngi, kaba la pynkup burom ia kitei ki samla kiba la pyndep ia katei ka Training, la sakhi da ka jingdon u Dr Joram Beda, Secretary ka Soil and Water Conservation ka sorkar Meghalaya kum u kongsan, ha ryngkat ka jingdon kiwei de ki heh ophisar sorkar, kiba kynthup ia ka kong I Rynjah, Director Soil and Water Conservation, M Diengdoh DSW/ Sr. Instructor CTI Byrnihat, P.P Lyngdoh Joint Director CTI Byrnihat lem bad kiwei de ki ophisar, nalorkata la donlang ruh da kiba bahaiing ha sem jong kitei ki samla kiba la dep shah pyntbit hapoh ka CTI.

Na kitei ki 18 ngut kiba la pyndep ia katei ka jingshah hikai jong u snem 2021-22, 15 ngut ki dei na Soil and Water Conservation ka sorkar Assam, 2 ngut ki dei na Arunachal Pradesh bad uwei na Soil and Water Conservation (T) Division Resubelpara Meghalaya. Ia kitei ki samla kiba la dep shah pyntbit hapoh katei ka CTI, la sam syrnod bad ki khusnam na bynta kito kiba la lah ban shakhmat bad kiba ioh bun marks, la ka long ha ki exam, training, ha ki kam ialehkai sports lem bad kiwei.