Pynkup burom ka SKSC sha ki 3 ngut kiba pass bha

Amlarem, 28 Nailar:
Ka Syndai Kmai-shnong Senglang Club kaba don hapoh jong ka shnong Syndai sa shisien biang ka la bteng biang ia ka jingsam khusnam sha baroh ki khun jong ka shnong kiba hap hapoh jong ka Syndai pyllun hi baroh kawei ha ryngkat ka jingdonlang ki Rangbah Shnong ha ki lai tylli ki shnong ba hap hapoh ka shnong Syndai, Ki Secretary Shnong, Secretary Club U Ma Henry Manar, Sport Secretary Shnong u Ma Martin Pohplet,ki riew rangbah bad lem bad ki paidbah jong ka shnong hi baroh kawei.
Ha shwa ban sam ia kine ki Khusnam na ka liang jong u Secretary Club u Ma Henry Manar, u la ong ba kane ka jingsam ka long kum shi bynta ban pynshlur ia ki khun jong ka shnong ha kaba iadei bad ka pule ka puthi jong ki khnang ba kane ka long ruh ba kiwei ruh ki ban sa leh ia ki exam jong ki nangne shakhmat ba kin bud ia kane ka juh ka nuksa khnang kan wanrah burom ia ka shnong hi baroh kawei.
Ha kajuh ka por la ioh ruh ia ka jingkren jingsneng jingkyntu na u Sport Secretary ka shnong u Ma Martin Pohplet da kaba u la ong ia kito kiba ioh khusnam ba wat la ioh ia kano kano ka jingainam kim dei pat ban don ka jingsarong namar ba ka jingsarong ka lah ban ialam ia ka jing jot bad jingbabe. U la kyntu shuh shuh ba ki dei ban don ruh ka mynsiem iaishah ha kano kano ka bynta khnang ka kin lah ban kheit ia uta u soh jong ka jingjop ha ka jingim jong bad ruh ba kan long ka burom ia ka shnong ka thaw bad ia ka thain bad ia ka ri hi baroh kawei.
Kiba ioh khusnam ha kane ka snem khynthup ia ka kong Satisfy Paslein, ka kong Meaidahun Pamthied bad ka kong Dashisha Gayang bad ha kane ka jing pynkup burom la ai ryngkat ia ka Certificate bad ia ka song Pisa .