Pynkup burom ka Rongmesek, ia 3 ngut ki nongialeh Hill State

Nongpoh:Ha ka sngi ba ka Meghalaya, ka rakhe kyrpang ia ka jingdap ba 49 snem naduh ba ka ioh ia ka jylla kaba pura, katba ka Dorbar Shnong Rongmesek ka la rakhe ia ka Meghalaya Day, da kaba pynkup burom ia baroh ki nongialeh Hill State kiba dei ki riew tymmen ha katei ka shnong.

Katei ka jingpynkup burom da ka Dorbar Shnong Rongmesek ia kitei ki Nongialeh Hill state, ki la sdang naduh u snem 2009 bad naduh utei hi u snem, ki la bteng ban pynkup burom ia ki tad haduh kine ki sngi, kata man ka sngi ba rakhe ia ka Meghalaya Day.

Ha katei ka jingpynkup burom, ka DS Rongmesek, ka la ioh ban pynkup burom ia 6 ngut ki riew riew ialeh ban pynioh ia ka Meghalaya kum ka jylla kaba pura, na kitei ki 6 ngut, 3 ngut ki dang im kat haduh kine ki sngi bad 3 ngut kiwei pat ki la khlad noh.

Haba iadei bad katei ka jingpynkup burom, u Bah Albinus Timung, Rangbah shnong Rongmesek, u la ong ba ka nongrim kaba la pynlong ia ka shnong ba kan pynkup burom ia ki, ka dei namar ba ki la sngewnguh eh ia kaei kaba ki la leh naduh ki por mynshwa.