Nongpoh: Ka Ri Bhoi District Sports Association (RBDSA), hynnin ka sngi ka la pynkup burom baroh ki rang bad thei ialehkai Athletic na Ri Bhoi, kiba la wanrah ka nam bad burom ia ka Distrik, lyngba ka jinglah jong ki ban ialehkai bha tad haduh ba kin da lah syndon ban rah ia ka nam lahduh ha kane ka Inter District Athletic Meet 2019, kaba dang shu dep shen ha Nongbah Shillong.
Ha kaba pynkup burom ia kitei ki rang bad thei ialehkai ka Ri Bhoi, la sakhi da ka jingdonlang u Dr. D.D Lapang, nongaibuit ka sorkar jylla, u Bah Jason S Mawlong, u Bah Charles Marngar, MDC Mawhati, u Bah R.B Shadap, President ka RBDSA, ki nongkitkam ka RBDSA, ki kmie ki kpa jong kitei ki khynnah lem bad kiwei ki riew rangbah ka them Ri Bhoi.
Nalor ka jingpynkup burom ia ki nongialehkai Athletic, na ka liang ka RBDSA, ka la pynkup burom ruh ia ki heprit, kiba la poi sha ka thup jong ha phainal ha ka lympung ialehkai phutbol ka U-12 CYMDS kaba dang shu dep ha Nongbah Shillong, ha kaba ka Ri Bhoi ka la wan ha ka kyrdan ba-ar.
Na ka liang ka RBDSA, ka la pynkup burom ia kitei ki rang bad ki thei ialehkai, da kaba sam da ki Momento ne ki tiar sah jingkynmaw sha baroh kiba la don bynta ha ka ban wanrah nam ia ka Distrik lyngba ki kam ialehkai.
Ha kane ka jingpynkup burom ia kitei ki nongialehkai ka Ri Bhoi, la ioh jingkren na kiba bun ngut kata kaba kynthup naduh u Dr. D.D Lapang, ha kaba ki la pynpaw ia ka jingkmen ban iohi ia ka jingnangkiew ka Ri Bhoi ha ki kam ialehkai bad khamtam eh ha ka Athletic.
Ki la kyntu kynpham ia kitei ki rang bad thei ialehkai, ba ki dei ban trei shitom shuh shuh, khnang ba kin nangkiew ha ki kam ialehkai bad ba kin ioh ruh ban mih khmat ym tang ia ka Distrik, hynrei ia ka Jylla bad na ka Ri ruh kumjuh.
Phi don ban ong eiei?