Pynkup burom ka Nehru Memorial Scool

Shillong, 11 Nohprah:
Ka Nehru Memorial Secondary School kawei na ki skul ha Ri Bhoi District ka ba don ha Umsning mynta ka sngi ka la pynlong ia ka jingpynkup burom ia ki Nonghikai ki ba la shakri palat arphew san snem shaneng kumjuh ruh ia ki khynnah skul ki ba la pass bha bad wan sha khmat ha ka exam SSLC bad topper ha ki klas bapher bapher.
La pyniaid ia ka jingialang da U Bah S.O Lyngskor u ba long u Secretary ka Managing Committee jong ka Nehru Memorial Secondary School bad ha kajuh ka por u la ai ia ka jingkren pdiang ia baroh ki ba la ia poi sha katei ka jingialang. La ioh jingkren lyngkot na u Head Master ka Skul U Bah L.Lapang. La ioh ruh ia ka jingrwai ba kyrpang na ki khynnah skul Class X ki ba la rwai ia ka Skul Anthem.
Ki nonghikai bad ki nongtrei ka skul kiba la shah pynkup burom ki long u bah Lapang, 26 snem, u P.Chetri, 25 snem, u T.Timung, ka kong R.Nongrum, 27 snem, kong S.Khongwir, 27 snem, kong S.Shylla, 30 snem bad kong C.Shangpliang. Kiba la pass bha bad wan sha khmat ha ka SSLC- 2014 ki la don 14 ngut, bad 11 ngut ki khynnah skul naduh Nursery haduh klas IX. Ka Nehru Memorial skul kum ka jingai mynsiem bad pynshlur ia kiwei pat ki khynnah kan ai jingpule ei shisnem na ka bynta ki khynnah ki ba ioh topper ha ki klas bapher bapher.
U Dr.DD Lapang kum u kongsan u la ai ia ka jingiaroh ia ki nongpyniaid jong ka skul, kumjuh ruh ia ki Nonghikai, ki nongtrei.U la ai ka jingiaroh, ai mynsiem ruh ia ki khynnah ki ba la leh bha bad wan shakhmat ha ka SLLC Exam bad ia ki khynnah ki ba la wan shakhmat ha ki klas bapher bapher ki ba la wanrah ia ka burom jong ka skul da ka ba u kyntu ruh ia ki ba ki dei ban long ki khynnah ki ba minot bad thrang ban poi sha ka thong, u la ong ruh ba kim dei ban shaniah ha kiwei hynrei ki dei ban long ki ba trei shitom dalade hi bad u la ong shuh shuh ba ka jingduk kam dei ban khang lad ia ka jingpule ka jong ki.
U Dr.Lapang ha kane ka jingialang pynkup burom u la ong ruh ba na kaliang ka jong u un ia donlang ha syndah ban ia treilang na ka bynta ban nang kyntiew shuh shuh ia ka skul bad ban rah sha ka sorkar ia ki jing donkam jong ka skul. La ioh jingrwai na ki khynnah class IX bad la ioh ia ka jingkren ai khublei na u Asst. Headmaster jong ka Skul u Bah C.K.Jahrin.