Pynkup burom ka MAYC ia U Bah Wanarki

Shillong, 6 Lber:
Ka Mawsynram Assembly Youth Congress (MAYC) ka la pynkup burom ia u Bah Wanarki Laloo President barim hadien ba u la shongthait bad ia kane ka kam la shimti noh da u samla Barrister Shangpliang. Ia kane ka jingpynkup burom la pynkup da u Bah Pynshngaiñ N Syiem, MLA/MDC ka Mawsynram constituency.
Haba ai jingkren, u Bah Pynshngaiñ N Syiem u la ai ka jingkhublei namar hapoh ka jingialam u Bah Wanarki Laloo kum u President u la ioh ia ka jingjop ha ka ilekshon lyngba ka jingtrei shitom ki samla. U kyrmen ruh ba ha kane ka kynti hapoh ka jingialam u samla Barrister Shangpliang ki samla Congress kin dang khlain shuh shuh.
Na ka liang u Bah Wanarki Laloo u la pynpaw ka jingai khublei ia ki para samla kiba la iatrei shitrhem ha ka por jong u bad u kyrmen ruh ba ka MAYC hapoh ka jingialam u samla Barrister kan dang trei smat ym tang ia ka kam seng hynrei ia ka jingdonkam ki paidbah ka thaiñ.
Ia u samla Barrister Shangpliang la shah jied kum u President ka MAYC ha ka ilekshon ba la pynlong da ka Indian Youth Congress bad mynta ka sngi la jied ia kiwei de ki nongkitkam ban pynkhlaiñ ia ka MAYC kaba dei ka Executive Committee (EC), kita ki long, Vice-President- Rangkines Marwein, General Secretary-Firmly Standing Marbaniang, Adviser-Bah Wanarki Laloo bad Bah Deystar Roy Kharshandi. Ki dkhot jong ka Executive Committee kin long ki President jong ki Area Youth Congress.