Pynkup burom ka KSU South-Central ia ki samla pule

Shillong, 31 K’lyngkot:
Ka KSU South Central Pynursla mynta ka sngi ka la pynkup burom ia ki 18 ngut ki samla pule jong ka thain Ri War Pynursla kiba pas bha ia ki eksam bapher bapher jong u snem 2013.
Ha kane ka sngi la pynkup burom ia khatsan ngut ki ba pas ia ka matrik (SSLC), arngut ngut ki klas XII (HSLC) bad iwei I ba ioh 4th position ha ka BSc (Mathematics).
Ia kine ki samla la pynkup burom da ka KSU South Central ha kaba u kongsan ha kane ka sngi u dei u BDO jong ka Pynursla Block Bah Present Tynsong, u Symbud Kongsan u 2nd Officer Incharge Pynursla Police Station ba la don lang u Rangbah shnong Nenggate u Bah K Khongdup bad kiwei kiwei ba la pyniaid ia ka jingialang da u President ka KSU South Central Circle u samla Promeyoo Khongjirem.
Ia kane ka khusnam ksan rngiew award la pynlong kum shi bynta ban ai mynsiem ia ki samla ba kin nang trei shitom shuh shuh bad ban ai mynsiem ruh ia kiwei pat.
Ki nongkren bapher napher ha kane ka sngi ki la kyntu ia kine ki samla ba kin nang trei shitom ha ka jingpule jong ki bad ki la ai khublei ia ka KSU ba ki la pynlong ia kane ka prokram ban ktik ia ki samla ba kin nang kiew ha ka jingpule jong ki khnang ba kin long ki atiar jong ka thain bad ka ri bad ka jaidbynriew.