Pynkup burom ia U President ka West DCC

Nongstoiñ, 6 Jymmang:
Hadien ba ka Meghalaya Pradesh Congress Committee (MPCC), ka la i bit ban jied ia u bah Bormanding Nonglang kum u President ba thymmai jong ka West Khasi Hills District Congress Committee; na ka liang jong ka District Youth Congress ha ka 1 tarik u Jymmang ka la ioh ban pynlong ia ka jingialang na ka bynta ban pynkup burom ia u tei u President ba thymmai jong ka DCC.
Ia katei ka jingialang la pynlong hapoh Congress Bhavan ha Nongstoiñ, ha ryngkat ka jingdonlang u Chief Adviser ka DCC, U ma BK Bani, ka Dr. Eureka Lyngdoh, U bah Gabriel Wahlang President ka NBCC, bah Kimfa Sidney Marbaniang, President ka RBCC, u bah Lambok Nongrang na ka Mairang BCC, u bah S. Rashir na ka Mawshynrut BCC bad kong Irin Lyngdon na Mawthadraishan BCC bad kiwei kiwei.
Hadien ba ka District Youth Congress ka la dep ban pynkup burom ia u President ba thymmai jong ka DCC, la bteng pat sa ka jingialang na ka bynta ban pynthymmai noh ia baroh ki nongkit kam, ba kynthup ia ki President, ki dkhot Executive Committee bad kumjuh ki nongkitkam jong baroh 5 tylli ki Block Congress Committee ha ryngkat ka jingpynskhem ruh artad ia kitei ki nongkit kam kiba thymmai.
Shuh shuh ha katei ka jingialang la ioh ruh ban iakren na ka bynta ki kam jong ka seng bad khamtam ha kaba iadei ban nang pynkhlain shuh shuh, hapoh jong ka thain khang ba kan wanrah ia u soh jong ka jingjop ha kane ka Election sha ka iing Dorbar thaw ain jong ka Jylla ka ban sa long shen.
Katba na ka liang jong u President ka DCC ba thymmai u bah Bormanding Nonglang haba ai jingkren ha katei ka jingialang, u la ai khublei kyrpang ia ka MPCC kaba la ibit ban jied ia u, kum u President jong ka DCC bad kumjuh u la ai khublei kyrpang ruh ia ka District Youth Congress kaba la pynkup burom ia u, bad ha kajuh ka por u bah Nonglang u la ong, ba kaba don kam ia ka seng, ka long ban ioh ia ka jingjop ha u 2018, ka donkam ka jingiatylli bad ka jingiatreilang da baroh ki nongkitkam jong ka party baroh kawei.