Pynkup burom 80 ngut ki nongseng ka Balang Riatsamthiah

Shillong, 05 K’Lyngkot:
Ka Balang Riatsam thiah ka la pynkup burom ia ki 80 ngut ki nongseng ka Balang Presbyterian Riatsamthiah, bad ia kane, la leh namar ka jingdap san phew snem ka Balang ha une u snem naduh ba la seng ia ka.
U nongialam ka Balang u Bah RG Dkhar haba pyndon burom ia kine ki nongseng ka Balang, u la iathuh ia ki khana ba la sdang ia kane ka Riatsamthiah Presbyterian Church. La sdang ia kane ka Balang na kaba rit hynrei ka la nang heh katba nang iaid ki sngi haduh ba kan poi sha kane ka lynti jam ban kynjoh sha ka san phew snem. Ka long ka burom ia u Blei uba la kyrkhu ia ka baling, la on u Bah Dkhar.
“Ka dei ka jingpyrshang bad ka jingkitkhia jong ki nongsharai Balang kynthup ki Pastor, ki longsan ba ka Balang ka la poi sha kaane ka thong, ainguh ia u Blei namar kane”, la ong une u nongsharai Balang.
U Bah Dkhar u la ong ba dei ha u snem 1916 ba ki nongsharai Balang ka Mawkhar Presbyterian Church ki la ai jingmut ban thaw noh ia ka tnad ha Riatsamthiah bad dei ha u snem 1924 ba kane ka jingmut la pdiang bad ha u 1928 ka tnad Riatsamthiah jong ka Mawkhar Presbyterian Church la thaw da ka Jingïaseng Samla.
Watla ia ka iingmane la sdang ha 25 tarik Jylliew, 1963, hynrei ka la ioh ia ka jinglong ba pura ha ka 5 tarik Kyllyngkot, 1964 bad la pynkyntang ha ka 24 tarik, Naiwieng 1985.
Ka Golden Jubilee Celebration ka Riatsamthiah Presbyterian Church ka la pynlong ruh ia ka jingiaseng “Ïa U Blei Long Ka Burom” ha kane ka sngi Saitjain.