Pynkulmar ka hamsaia “mluh” ha kylleng ka Ri Khasi Jaintia

Shillong,15 Nawieng:
Puk u paidbah u la tur sha Iewduh ryngkat ka jingiaknieh iwei ia iwei tang ban ioh thied ‘Mluh’, ki la ia lymbub para maki ban tur sha ki dukan die marbam ban wad mluh khlem salia ban thied wat la ki don ki ba die tam katto katne ia ka dor ruh tang ban lait na ka dor kaba heh, kumba la saphriang ka khubor hamsaia ba ka mluh kan sa kiew dor sha ka T.150 ne T.200 tyngka shi kilo.
Katei ka khubor hamsaia ba ka mluh kan sa kiewdor ka la pur sted ha iewduh mynta ka step, bad tang shu bna katei ka khubor ki paidbah kiba la ia wan ban donkam na ka bynta la ki jong ki jong ki kam ki la ia beh pynban sha ki dukan marbam ban thied mluh. Ka iew die mluh ka la thnam bha naduh ka por 9 baje shajrong ha kaba uwei u briew u thied haduh 6 ne 7 kilo ka mluh tang na ka bynta ban pyndonkam ia lade bad don ruh kiba kit syndon shi byrni kata ruh ym ban die hynrei ban buh ban bam ialade. Tang kumba lai kynta eiei ba ki nongthied mluh ki la beh thong ban thied mluh, la lap ba ym don mluh shuh ha ki dukan ha Iewduh.
U nongthohkhubor , u la wan ban jurip ia ki dukan marbam ha Iewduh, la lap ba kat kiba tur sha ki dukan die marbam ki dei ki nong wan wad mluh, hynrei la iohi ba hadien katei ka lai kynta ki dukan die marbam kim lah pyndap mluh shuh bad ha baroh kawei ka iew ym don mluh shuh.
Ka khubor Hamsaia shaphang ka mluh, ka la pur sted haduh katta katta ha kaba katei ka khubor ym tang ba ka la pur tang ha sor Shillong hynrei ka la pur kylleng ka jaka wat ha ki jaka nongkyndong ruh. Ki la don bun ngut ki nongia phone sha u nongthohkhubor ban kylli ia katei ka khubor bad hadien ba la ioh ia ka phone jong kiba bun ngut la wad jingtip shaphang kane bad la shem ba ka khubor ka la saphriang tyngeh ha Iewduh bad bun ki jaka ha ki khapsor.
La ioh jingtip ba ha khapsor, ym don mluh shuh ha ki dukan rit ne dukan shnong namarba ki paidbah ki la ia beh kat kiba kham sted ban thied shuwa bad kiba la thied lypa ruh ban dap da ki bnai, ha sohra ruh la ioh khubor ba ki paidbah ki la rah da ki 5 ne 6 kilo uwei u briew tang na ka bynta ban buh ban bam ialade, ha nongstoin ruh la ioh khubor ba kane ka juh ka jingjia la jia ha katei ka sor.Ka juh ka khubor ka la purr uh sha kiwei pat ki bynta ka jylla bad kane ka la wanrah jingartatien ki paidbah.