Pynkulmar jingmut ki khynnah iohpang ksuid khyllah

Nongrim Jirang: Ha ka jingjia ba kham sngew shyrkhei bad phylla ha kawei ka shnong, kumba 12 ngut eiei ki khynnah kila kem pang ksuid khyllah haduh ba ka la pynklumar jingmut ia kiba haïing hasem, bad ki nongshong shnong.

Kane ka la jia ha ka shnong Umkrem Dyngkhong, kaba don ha thain Nongrim Jirang jong ka Ri-Bhoi ha khappud ka Meghalaya bad ka Assam. Ha ka jinghiar ki nongthoh khubor, la lap ba ki longkmie, ki samla kila ap bad pynshngain khrui hapoh ka ïingmane namar ba ka don ka samla lud kaba kem pang, la pynrah sha ïingmane ban pynlong ia ka jingduwai.
Ha ka jingiakren u nongthoh khubor bad ki Tymmenbasan ka Balang Presbyterian, ha kane ka shnong, kila iathuh ba kane ka jingpang ksuid kaba ktah ia ki samla lud ka la jia katto katne bnai mynshwa bad haduh mynta ki dang don kiba pang.

“Naduh u bnai Iaiong mynta u snem, ki khynnah kila ioh ia kane ka jingpang haduh ba ngim lah ban peiphang ban shemphang bad ngi don ha ka jingsngewsih khamtam ma nga kumno ban pyllait ia kane ka jingteh jingkhum jong ki bor bymman ki bor jingdum”, la ong u bah Tymmenbasan u bah Armim Rani jong Umkrem Dyngkhong Balang Presbyterian.
La iathuh ba kane ka jingpang kam da jur mynshwa hynrei mynta ka la kham ktah shuh shuh watla ki don kiba la koit ruh.

“Mynshwa ka don tangba kam jur haduh katne, ka jingialeh haduh ban peit miet peit iong kam don, ne ban rah shaduh ïingmane kam pat don. Ki ong ia nga, Tymmenbasan, rah ia ngi sha ïingmane ba kita ki ksuid kim ioh bor ban ialeh ia ngi. Ha kane ka snem, ka la don ka jingialeh kaba jur, naduh ki khun samla ka Balang, ki don ban iarap ia kiba ioh pang ban rah ban kit na ïing sha ïing jong nga, namar ha ïing jong nga kila rah ban wad jingiarap na ki nongpynduwai nangno nangno”, la ong u Tbn. Armim.
Na ki 12 ngut kiba la kem pang bad mynta kila koit bad sa tang 3 ngut eiei kiba dang jur ba trei jur u bymman.

“Ngi aiti ha u Blei ba ngin lah ban jop ia ki da ka bor jong ka jingiarap jong u Blei”, la ong Tb. Armim.
U la ong ba um ngeit ia ka jingkynnoh ba leh sniew uta uta uba phah ia ki ksuid bad ki khynnah kiba kem pang ki la ong ba ki dei ki ksuid bad ki la ai kyrteng ruh ia ki.
“Nga te halade, ngam da ngeit ia ka kynnoh jong kita ki khynnah ba dei uta dei uta, hynrei ha ka sien ba leit rah ia ki khun nangne na shnong sha ïing Tymmensan Amos Shangpliang, ki la iathuh ba dei ki ksuid, kiba kyrteng kita kita bad hadien hadien ba la wan, la shah kynnoh ba don ba phah ia kita ki ksuid”, la bynrap u Tb. Armim.

U Tbn. Armim u la ong ba lada don ba long kumta, um don kano kano ka jingsih hynrei u kwah ban ioh ia ka jingkylla ban phai sha u Blei.
Kumjuh u Tymmen basan Bidis Doloi, u la iathuh ba hadien ba la duwai u Tymmen basan Amos Shangpliang, la jubab uta u ksuid. “Ngim tip ia kata ka jingpang kaba kem ia kine ki khynnah, ynda la pyrkhat, te ngi la phun ia u Tymmen basan Amos, ula duwai bad ynda ula duwai, la jubab uta u ksuid, ynda u Tbn. Amos, u la kylli ia ka kyrteng, me dei uei, uta u ksuid u la iathuh ia kata ka kyrteng bad ha ka jingiasaid jong u Tbn. Amos, teng teng u ksuid u kohnguh bad u mih noh tangba ngam tip ia ki kyrteng kita ki ksuid”, la ong u Tbn. Bidis.

U Tbn. Bidis u la ong ba u Tbn. Amos u la ong ba ia kane ka kam, ym donkam ban pynkulmar, bad dei ban iai shah namar ba u Blei ba halor u tip ia kane.
U la iathuh ba ha ka sngi Saitjain la don ka jingthmu ka shnong ban lum dorbar ban iakren ha kaba la don lang ki bor Hima, ki pulit, ki majistor bad ki paidbah ka shnong ban iakren ia kane ka kam hynrei kam shym la long kam.