Pynkiew tulop hapoh 10 sngi, ne yn mih surok, byrngem ki nongshet ja sngi

Shillong:Ki longkmie nongshet ja sngi ha ki skul bapher bapher kiba don ha ka kynhun kaba la tip ka All Meghalaya Mid Day Meal Worker Union, myn ha ka sngi nongkong ka 31 tarik Risaw 2022, ki la ialum lang khrui ban pynlong ka jingialang kaba la long ha madan Iewrynghep, Fire Brigade ban dawa na ka sorkar jylla ba kan kyntiew noh mardor ia ka jingai sngewbha (honorarium) na ka T.100 sha ka T.2000 shi bnai.

U nongai buit kane ka kynhun, uba long ruh ua Adviser u Bah K L Pariat, u la iathuh ba ka jingbuh ha khmat ka sorkar jylla ban dawa ba kam dei ban siew ia ka Honorarium tang na bynta 10 bnai, hynrei ka dei ban siew lut 12 bnai.

U Bah Pariat u la iathuh ba ki la dawa ka bhah na ka sorkar jylla kaba long 10 percent bad na ka sorkar pdeng 90 percent. “Ngi kyrmen ba u Myntri Rangbahduh ka ri u Narendra Modi un pynkiew noh ia kane ka bhah ha kane ka Dorbar Mang tyngka jong u 2023,” u la ong.

Shuh shuh ula pynsngew, ba kum ki nongshet ja sngi baroh shi katta ka kam ka iaid shait shait sha khmat, hynrei sngewsih ba haduh mynta kim pat la ioh ka bai nong haduh lai bnai kata u bnai Naitung, Nailar bad Nailur, wat la ka jingsiew ka duna. Ula bynrap ba ka sorkar jylla ka dei ban pynbeit ban ioh ia ka Honorarium, na bynta u bnai Nohprah bad Kyllalyngkot ban siew lang ia kine ki bnai, khnang ba ki nongshet ja sngi kim ioh lehkmen lang ia ka Khristmas kumba leh kiwei.

U Pariat, la iathuh ba dang shen ha ka jingiakynduh ia u Commissioner Secretary ka Pule puthi, u la kren shai ba haba iadei bad ka jingpynkynkiew ia ka Honorarium na ka bhah tyngka ka sorkar jylla ka shong ha ka jingialang jong ki Myntri sorkar ka jylla, “Na ka liang u Commissioner & Secrretary ka pule puthi, u la ong ba mynta ki la pynkhreh ia ka jingthoh ha kaba ka sorkar jylla, kan shong ia ka jingialang jong ka kynhun Myntri Sorkar ha kine ki khyndiat sngi ban kan rai la kan pynkiew ne em ia kane ka Honorarium.

Ka kynhun ka la shim ïa ka rai ba kin buh por ia ka sorkar jylla hapoh 10 sngi, ba kan pynurlong noh ia kane ka jingdawa lem kumta kim banse ban mih surok ban pynlong da ka jingiakhih paidbah, namar kane kam dei shuh ka sien kaba nongkong ba mih surok, ka la dei bun bun sien ban dawa bad ula iathuh ba wat mynta ki paitbah kiba na kylleng ki District kiba thmu ban wan ha kane ka jingialang pynban ki la shah khang lynti noh jin haduh 6 ne 7 kali, kiba la shah bat ha Mawrangkneng bad ha Lad Umroi.
U Pariat, ula ong shi bynta kane ka jingkhang ki bor pulit ka dei namar ka jingjia pynklumar jong ki riew shim kabu da kaba shoh ba dat ïa ki briew kiba iaid ba ieng, kaba la jia ha ki taiew ba ladep, lyngba ka jingiaid paitbah kaba la pynlong da ka FKJGP, hynrei ïa kane u Pariat ula pynrem jur ïa ki bor pulit kiba la pakhang lynti ïa ki dkhot nongshet ja sngi da kaba pynianujor kum kitei ki jing jia, namar ki nongshet ja sngi bun ki dei tang ki kynthei bad longkmie.