Pynkiew tulop da 5% shisnem, ba ki nonghikai kin nym mih surok:FASToM

Shillong:U President ka FASToM u Bah Kenneth Shadap u la ia thuh ba na ka liang u Secretary ka tnat Pule Puthi ka Sorkar Jylla u Ambrose Ch. Marak u la kdew ba ym lah satia ban pynurlong ia ka jingdawa ban kyn tiew kyrdan Deficit Pattern/Deficit System ia ki skul Adhoc, hynrei u la ai da ka jingtyrwa ban pynkiew ia ka jingsiew tulop (increment) kaba T.18 hajar.”

“Ka tnat Pule Puthi jong ka Sorkar Jylla ka la kyntait ia ka jingtyrwa jong ka Federation of All School Teachers of Meghalaya (FASToM) ban kyntiew kyrdan Deficit Pattern/Deficit System ia ki skul Adhoc kiba don hapoh ka jylla Meghalaya baroh na ka daw ka jinghiran ka pla tyngka jong ka Sorkar Jylla”la iathuh u bah Shadap.
U la iathuh ba katkum kane ka jingtyrwa ban pynkiew ia ka tulop da T.18 hajar kan long ryntih ia baroh ki nonghikai skul Adhoc kiba hikai ia ki skul Higher Secondary, ia ki nonghikai sobjek Science ha ki Secondary, ia ki Asst. Teacher ha ki Upper Primary, ha ki Lower Primary bad ia ki nonghikai ha ka sobjek Hindi.

“Ka jingpynlut pisa haba siew tulop sha ki nonghikai skul Adhoc ha ka shi snem ka long T.145 klur,” u la ong bad bynrap, “Hynrei haba kynthup lang ia ka jingpynkiew tulop kaba mynta, ka Sorkar Jylla kan bei ia ka jingpynlut pisa sa kumba T.13 klur shi bnai bad T.156 klur shi snem.”
U Bah Shadap u la iathuh ba kane ka jingtyrwa jong ka Sorkar Jylla ban pynkiew da ka tulop ka long katkum ka jingiakren bad u Secretary ka tnat pule puthi kaba long ha ka 9 tarik, Kyllalyngkot, 2022.
U la iathuh ruh ba ka FASToM ka la kyrpad ia ka Sorkar Jylla ban pynkiew noh da 5% ia ka tulop manla u snem khnang ba ki nonghikai skul kin ym mih shuh sha surok.

“Ka jingtyrwa sha ka Sorkar ban pynkiew tulop ka long namarba ki nonghikai skul ki la iakynduh mawsiang na ka jingkiew dor shaba palat ka bai wai iing, ka bai skul khun, ka bai bording, ka bai kali bad nalor ba ngim ioh jingiarap bai dawai ha ka pang ka shitom,” u la ong.
Une u nongialam ka FASToM u la iathuh ruh ba ka seng ka la pynsngew hakhmat u Secretary ka tnat pule puthi ban siew tam noh khyndiat ia ki Headmaster, Headmistress bad ia ki Principal, namar ba ka kam ka kham khia bad trei tam ia ka por.