Pynkiew CS ia u Bah Warjri, dawa ka KHNAM

Shillong, 7 Jymmang:
U Working President ka KHNAM u Bah Adelbert Nongrum u la kynnoh ba u Myntri Rang bah ka jylla u Mukul Sangma u dei uba pyrshah ia ki Khasi bad kane ka paw lyngba ki kam jongu.
Haba kren mynta ka sngi,ha ki nongthoh khubor hadien ba la wai ka jingialang kyrkieh ka KHNAM, u Bah Nongrum u la ong ba u Mukul u dei u nongsynshar donbor, bad uba pyrshah ia ki Khasi. Kane ka jingkyn noh u bah Nongrum ka long ba kane ka sorkar hapoh ka jingialam u Mukul ka thmu ban thung Chief Secretary ia u BK Dev Verma ha jaka jong u Chief Secretary ba la pynjlan u Bah WSM Pariat.
“Kaei ka jingmut jong ka sorkar ban thung CS ia u Verma, kaei ka jingeh jong ka sorkar ban thung beit ia u Acting Chief Secretary Bah PBO Warjri”, la ong u Bah Nongrum.
U la ong ba u Mukul um dei u riewlum bad u thung ia ki ophisar da ki bar jylla bad ki briew kiba shu ong hooid ha ki kam bah eh. “Ngi la iohi u thung DC da u bar jylla, u CEO da u bar jylla bad mynta ia u CS ruh da u bar jylla”, la ong u Bah Nongrum bad bynrap, ba wat ia ka shuki Lamphang ka Iing dorbar thawain ruh la thung da u bar jylla.
U la takrain ia ki 11 ngut ki myntri sorkar kiba long ki synran jong u Mukul kiba buh ia ka shuki hakhmat bad ia ka jaitbynriew hadien.
Kumba la paw ha ki lad pathai khubor dang shen, ka sorkar ka la thmu ban pynkiew CS ia u Verma uba dei u Additional Chief Secretary ba peit ia ka tnad bording ka jylla.
Kane ka sorkar ka sngew khohnioh ban pynkiew kyrdan ia u Bah PBO Warjri namar ba u dei u briew uba trei beit uba khuid ha ki kam, la ong u Bah Nongrum bad na ka liang ka KHNAM, ka pynrem jur ia kane ka jingthmu ka sorkar ban iaid lait ia u Bah PBO Warjri uba dei ruh u ophisar uba la kham halor na kiwei pat.
Halor ILP:Ha kawei ka liang ka KHNAM, ka la kyntait ban pdiang ia ka Inner Line Permit (ILP) ki sengbhalang hynrei kan iakhun beit ban dawa ban pyntreikam ia ka ILP kaba rim.
“Kumno ki lah ban ong ba ka ILP kaba thymmai ka kham khlain ia ka ILP kaba rim, ia ka ILP barim kim kwah da kaba ai daw kan ktah ia ka roi ka par, kam jngohkai hynrei hato kane ka ILP kaba thymmai kaba ki kam kaba khlain kan nym ktah”, la ong jingkylli u Bah Latiplang Kharkongor ka KHNAM.
“Ngin ieng beit ban iakhun ban wanrah ia ka ILP kaba rim, kumba la dawa ki paidbah”, la ong u bah Adelbert Nongrum bad bynrap, ka por kan sa poi ba kan sa urlong.