Pynkhuid ka HNYF ia u mawpud ka KHADC ha Khanapara

Nongpoh, 20 Nohprah:
Da ka jingsngew khia halor ka jingbym ithuh shai ia u pud u sam ka jylla Meghalaya khamtam eh ha ki khappud ka Assam, ka Hynniewtrep National Youth Front (HNYF) Northern Region ha ka sngi Saitjain hapoh ka jingialam jong u president, Bah Marcus Marten, lem bad ka jingsynran lang u vice-president ka HNYF sengkmie, Bah Skan Rani lem bad ki nongialam na ki circle bapher na ka dong Ri Bhoi, ki la leit ban pynkhuid ia u mawpud ba la thung da ka KHADC ha Khanapara Ri Bhoi District bad pynbha ruh ia ka jingthoh kaba ong “WELCOME TO MEGHALAYA”
Haba iakren bad u nongthohkhubor, u Bah Marten la pynpaw ba kum ka seng kaba peit ia ka bha ka miat hapoh jong ka them Ri Bhoi, ki la shim ia kane ka sienjam ha kaban pynkhuid ia u mawnongrim, kumjuh ruh ban pynbha ia ka kaba la jot la pra kaba jingthoh “Welcome to Meghalaya”, khnang ba ki paidbah nongleit nongwan khamtam ki nongwan jngohkai pyrthei na kylleng kylleng kin tip bad iohi nangno u sdang pud u sam jong ka jylla Meghalaya.
”Bun ki paidbah na ka jylla Meghalaya, tang shu poi ha Khanapara kim sngewshuh ba ka dang dei ka jaka lajong, ka jingbun jong ki bar jylla kiba shong basah ha katei ka jaka bad ka jingbymdon ki kynja Signboard kaba kdew shai ba ka dang dei ka jylla Meghalaya, ka wanrah ia ka jingsngew nongwei khamtam ia kiba leit donkam teng teng ha Khanapara” bynrap u Bah Marten.Ha kaba iadei bad kane ka HNYF, NR, ka la kyrpad ia ki Syiem kiba na ki Hima bapher bapher kumjuh ruh ia ka KHADC, ba kin shimkhia ha kaban pynneh pynsah ia ki jingdon jingem jong ki Hima ki Raid kyrpang eh ia kito ki jingdon jingem ban pynsahnam bad ban pynithuh ia la ka Ri bad ka Jylla khnang ba ki paidbah ka jylla kin ym sngew nongwei ha la ka jong ka ri. Ka HNYF Northern Region ka la ai ruh ka jingkhublei Khristmas bad u snem thymmai uba suk bakmen ia baroh ki paidbah kiba shong basah ha ki thain Khanapara khappud bad ka Assam.