Shillong:Ka ri Maldives, ka la pynkhreh ban iakhun pyrshah ia ka India ha ka jingiakhun paralok kaban long ha ka 19 tarik mynta u bnai ha Polo, Shillong.
Ki rang ialehkai kynjatbol ka Maldives kiba wan poi ha Shillong naduh hynnin ka sngi, hynne ka janmiet, ki la hiar ban kilan met, ha madan jong ka SSA Stadium, First Ground, Polo.
Kumban shu pynkynmaw, ba kane ka kynhun ka la wan poi ha Shillong, kum shi bynta jong ka jingialehkai paralok (International Friendly), ha kaba kan iakhun pyrshah ia ka kynhun ialehkai jong ka India, ha ka janmiet jong ka sngi Balang jong ka taiew, katta 19 tarik, mynta u bnai, ha JN Stadium, Polo, Shillong.
Na ka liang u coach ka kynhun ialehkai jong ka Maldives, u Ali Suzain, ha kaba nyngkong u la ai ia ka jingiaroh ia ka nongbah Shillong, ha kaba u niew bad shim ba ka jinglong jingman ka suin bneng ka long kaba lam khriat, hynrei kaba biang bad paka pat naka bynta ka jingialehkai ia ka phutbol bad kyrmen ba ki playeer ki jong u, kin lah ban ialehkai bha.
Haba jubab halor ka jingkylli hato kum ka kynhun ka wan poi lut bad ki rang ialehkai ba kynsai, na ka liang u Suzain u iathuh ba baroh ki rang ba kynsai ki la don lang.
Bad ka kynhun ha kaba u sngew donbok ruh ba man la ki rang ialehkai ki don hapdeng ka met ka phad kaba koit bad khiah bad ki long kiba la pynkhreh naka bynta kane ka jingiakhun.
Phi don ban ong eiei?