Shillong,19 Rymphang: Ka jingialang jong ka United Democratic Party (UDP) mynta ka sngi, ka la jied president ia u Bah Titosster Well Chyne u MLA Sohra.
Ha kane ka jingialang, ba la wan poi ki dkhot ka party kumba 500 ngut na ki 10 tylli ki konstitwensi kiba hap ha East Khasi Hills, la jied ruh ia kiwei ki nongkitkam ba kynthup ia u Vice President Draison Kharshiing bad Bah Braston Kharbuli, General Secretary Bah Teinwell Dkhar bad Assistant General Secretary Bah Roland Nongrum, Joint Secretary Bah Spar Lyngdoh, Youth Wing Presideng Bah Hamlet Dohling, Secretary Bah Ryngkat Lyndem bad Womens Wing president Kong Pretty Pongrope, Advisor u Dr Donkupar Roy, Bah Remington Pongrope bad Bah R A Lyngdoh.
“Ngi la iakren ban pynkhreh bha ia ka elekshon MDC shiteng samoi khamtam ha Nongkrem bad Sohiong konstitwensi bad ngi la aiti ha ka circle ban jied ia ki kyrtong”, la ong u Bah Chyne hadien ba la wai ka jingialang mynta ka sngi.
U la iathuh ba ka jingialang ka la iakren ruh ban pynkhlain ia ka party ha man ki jaka khamtam ha ki konstitwensi bym don nongmihkhmat.
“Ka jingsniew ka surok na Umshyrpi sha Sohra, ka paw ba ka sorkar jylla kam don khmat kaba la wanrah ia ka jingeh bad jingjynjar ia ki paidbah” la ong.
U la ong ba ka party kan rah ruh ia ka mat kaba ktah ia ka rep ka riang jong ki paidbah ha kaba ka sorkar kam shym la leh eiei ban iarap ia ki nongrep.
“Ka jingialang ka sngew khia ia ka jingshah kynriah kam jong ki nongtrei bapher bapher jong ki tnad sorkar kum kiba trei Adhoc, Casual lane wat ki muster roll” u la ong.
U la ong ruh ba ka sorkar jylla ka la leh sting ia ka MCCL kaba la iakynduh shibun ki jingeh ia ki nongtrei. “Ki nongtrei kane ka MCCL ki la hap ban pynpep skul ruh ia ki khun namar bym ioh tulop la bun bnai”, la ong ka UDP.
Ki nonghikai SSA skul ruh kim ioh tulop biang por bad bunsien ki hap ban byrngem iakhih.
Ka jingkhang ia tih dewiong ha ka jylla, ka la ktah jur ia ki paidbah ka jylla bad ka sorkar ka dei ban shim khia ia kane, la ong u Bah Chyne.
Phi don ban ong eiei?