Pynkhreh ka South Africa ban tep don burom ia U Mandela

Ka jingpynkhreh, ka dang iaid shakhmat, na ka bynta ban leit on tep don burom, ia U President barim ka South Africa, U Nelson Mandela, uba dei u dohiong ba nyngkong eh, ban long U President jong katei ka Ri.
Ka jingkynmaw burom ia U Mandela, kan long haduh shiphew sngi kynthih bad ka jingleit on tep ia u, lehse, kan long kaba bun briew tam jong kane ka phew snem kaba mynta, namar ba kin don shibun bah ki heh ki hain jong ka pyrthei, ki ban leit ban ia shim bynta lang ha katei ka jingleh burom ba khadduh ia U Mandela.
U President ba mynta jong ka South Africa, U Jacob Zuma, ula pynmih ia ka hukum, ban pynher shiteng ia ka lama jong ka Ri, kaba sdang naduh mynta ka sngi bad katei kan iai bteng haduh ban da leit on tep ia U Mandela, ka ban long ha ka Sngi U Blei ban sa wan.
Tang shu mar ia khlad U Mandela, ha ka miet jong ka Sngi Palei, la kit noh ia ka met jong u sha ka jaka buh met iap jong ki shipai, ha Pretoria, ha kaba yn pynlong ia ka jinglehniam khadduh da U Bishop Desmond Tutu, uba dei uwei na ki paralok ba iajan bha bad U Mandela bad U Archi Bishop barim jong ka Cape Town bad ha kaba yn don shibun ki riew khraw jong ka pyrthei, ki ban ia shim bynta lang.
U President Barack Obama jong ka America lem bad u myntri rangbahduh jong ka England, U David Cameron, kin leit ban ai khublei khadduh ia utei u nongialam barim jong ka South Africa.
Ha ka sngi jong ka jingleit on tep, la khmih lynti ba u paidlang, uba 53 million ngut jong ka South Africa, ba un ia don bynta lang ha la ki jong ki jong ki jaka bad ha la ki jong ki jong ki shnong, kum ka jingleh burom khadduh ia utei u nongialam.
Ka jingleh burom ia U Mandela, kan dei kaba yn leh kat kum ka rukom jong ki ri sepngi bad ha kajuh ka rukom, yn leh ruh katba kum ka jingngeit jong ki briew ha ka shnong jongu, ha Thembu. Ia ka met jong U Mandela, la khmih lynti, ba yn buh ha ka jaka buh met iap ha ka hospital ki shipai ha Pretoria.
Haduh ka 10tarik Nohprah 2013, kan nym don kano kano ka jingpynlong ia ki prokram jong ka sorkar, ha kaba ha katei ka sngi, yn don ka jingialang pyndon burom ia U Mandela, ha ka stadium ha Johannesburg, kaba ngiam haduh 94,000ngut ki paidbah.
Ynda la dep lut ka jinglehniam, yn tep ia ka met jong U Mandela, ha ka shnong jongu ha Qunu, ha kaba kin don ki nongialam jong ka pyrthei, ki ban ia don lang ban khublei khadduh.