Pynkhreh ka sorkar, ban sam shini reshon da ka dor iew

Shillong, 6 Nailur:
Ki paidbah kiba bam shini reshon (Public distribution system) kin duh shwa katto katne bnai namar ba ka sorkar pdeng ka la pynsangeh shwa mynta namar ba ka dang khot tender ia ki kontraktor ban long ki nongsam (wholesale) sha ki dukan sam reshon (fair price) jong ki dong ki shnong bapher bapher.
Ki paidbah mynta la lai bnai kynthih ki khlem ioh shini namar ba ka sorkar ka la thmu ban pyntreikam thymmai noh ia ka rukom sam shini, ha kaba ia ka dor jong ka shini yn khein ne pynshong dor katkum ka jinglong jong ka iew ka hat bad kam ym dei shuh kum ka dor ba la buh da ka sorkar kum mynshwa.
Katkum ka jingong jong u Joint Director ka tnad Food & Civil Supplies u Bah PM Syiem, mar ia dep jied ia ki Kontraktor ka sorkar kan sa sam paidbah noh ia ka shini bad shi shi khlieh briew yn ioh 650 kram.
“Ka sorkar kan ai jingiarap (subsidy) ia ki paidbah ha ka dor T.18 shi kilo”, la ong u Joint Director.
U la ong ruh ba ka jingsam ia ka shini yn pyntreikam katkum ka khanasumari jong u snem 2011 bad katkum ka khanasumari ka jingdon jong ki paidbah ka jylla ka la kot sha 29 lak ngut tam.
La iathuh ruh ba ka jingpyndonkam shini man u bnai ha kane ka jylla ka long kumba 1704 metric ton.
Kumba long mynta ka ka dor shini ka long T.40 shi kilo ha ka dor iew. Lada ka shong dor T.40 shi kilo ki paidbah ki hap ban sei T.22 na ka pla bad lada ka kham hiar ki dang ioh tad bad lada ka kham kiew dor ki paidbah ki hap ban sei kham bun na ka pla.