|
Shillong: Ka Langsning FC ka la pynkhreh ban iakhun lashai ka sngi pyrshah ia ka Chennaiyin ha ka lympung Second Division League ha JN Stadium, Shillong por 4:00pm.
Ia ki tiket ban peitkai lah ban thied ha ka dor T. 20 haduh T. 100 na SSA counter kiba don ha Polo. Ia ka Langsning yn ialam da u coach u Bah Hering Shangpliang uba ju hikai teng ia ka Shillong Lajong, ia ka Rangdajied United ha ki snem ba la dep. “Ki nongialehai jong nga ki long kiba la pynkhreh na ka bynta ka jingialehkai lashai ka sngi. Ka jingkilanmet jong ngi ka la biang pura ha kine ki bnai ba la dep bad ngi khmih lynti ia kaba bha tam lashai,” la ong u Bah Hering Shangpliang haba kren sha ki lad pathai khubor mynta ka sgi. U la ong ba ki nongialehkai nabar ri ruh kila lah ban pyniahap ia ka jinglong ka rukom ialehkai ha India hadien ba ki la iakilanmet bha ha kine ki sngi. Katba u coach ka Chennaiyin FC u Harish VK, ula ong ba ki nongialehkai ki hap ban pyniap ia ka jinglong ka suin bneng ha kane ka jaka. Ha kane ka jingialehkai, ka Langsning ka don lang ha ka kynhun bad ka TRAU FC na Manipur, Mohammedan Sporting bad lai tyllli ki kynhun na ka ISL – Bengaluru FC, Jamshedpur FC bad ka Chennaiyin FC. Ar tylli kiba wan shakhmat eh na kane ka kynhun kin ioh rung sha ka phainal. Hynrei lada ki kynhun na ka ISL ki long ba nyngkong ne baar, yn ailad ia kiwei ki kynhun bym dei na ka ISL ba kin rung. Na ka liang ki bor pyniaid ka Langsning ki la kyrpad ia ki paidbah ba kin wan ban ai jingkyrshan ia ka kynhun khang ba kan ioh ia ka jingjop. U treasurer ka Meghalaya Football Association (MFA) u Bah Wanshanbor Kharkrang u la kyrpad ia ki paidbah ban wan ban sakhi lem ia kane ka jingialehkai lashai ka sngi bad ban ai mynsiem ia ka Langsning. |
