Nongstoiñ: Ka Party HSPDP Mawshynrut Konstitwensi ka la pynkhreh shait shait na ka bynta ka ilekshon MDC ka ban sa long shen bad tang hadien katto katne sngi ba ka Party ka la pynmih ia ka thup kaba nyngkong jong ki kyrtong ki ban ia ai reng, na ka liang jong ka seng napoh Mashynrut myn hynnin ka sngi ka la ioh ban lum ia ka jingialang paidbah na ka bynta ban pynithuh ia ka kyrtong jong ka party ka kong Badariti Lyngdoh Nonglait kaba dei ka khun pyrsa jong u Maieid Hopingstone Lyngdoh (Bam kwai ha dwar u Blei).
Ki Volunteer kiba la iakhun Hills State ha ryngkat bad U Bah HS Lyngdoh:Rupang
Ia katei ka jingialang la ioh ban pynlong hapoh ka iing skul jong ka Shiliang Bangla Church of God Secondary School Mawthengkut ha kaba la iadon ryngkat lang ruh u General Secretary ka Party HSPDP Central Body u bah Witting Mawsor u ba dei ruh u MLA barim katei ka thaiñ, ka kong Badarit Lyngdoh Nonglait kaba dei ka kyrtong MDC jong ka Party, u Ex Rev. K. Langrin Secretary ka HSPDP Mawshynrut, u Samla Arkhelos Diengngan, u bah O. Lyngdoh lem bad ki dkhot bad nongkitkam jong ka party na katei ka thaiñ bad ruh ki volunteers kiba la iakhun Hills State ryngkat bad u Maieid Hopingstone Lyngdoh.
Na ka liang jong u bah Witting Mawsor, haba ai jingkren ha katei ka jingialang, u la ong ba naduh ba la sdang ban seng ia ka seng HSPDP hapoh Mawshynrut ki dang don tang ar ngut kiba la jop na kiwei pat ki party hynrei baroh ki dei kiba la jop na ka HSPDP bad ka long ruh ka party kaba khlain bha hapoh ka thain Mawshynrut bad u la ong ruh ba hapoh Mawshynrut Konstitwensi kidon haduh 4 tylli ki thain ka thain pdeng, ka thain Nongtrai, thain Lyngngam bad thain Garo bad ia ka thain pdeng (Mawthengkut) la ju tip barabor kum u budlum jong ka party HSPDP bad u la ong ruh ba watla la shah rem noh ha ka ilekshon MLA ka ba dang shu dep pynban ki vote jong ka HSPDP kim shymla jah hynrei ki jah tang kyndiat bad sniewbok ba ngim lah shuh ban plus na kiba bun kidaw.
Ha katei ka jingialang la ioh ruh ia ka jingkren na ka kong Badariti Lyngdoh Nonglait, kaba dei ka kyrtong MDC jong ka Party kaba la pynithuh shwa ialade sha ki paidbah bad ka la ong ruh ba naduh ba ka dang samla ka don ia ka mynsiem ban iatrei na ka bynta ka Party bad ka la ong ruh ba ka long ruh kum ka nongtrei kaba rieh jong ka party bad ha ka jingiaid lynti ka la poi ka por ba u Maieid Hoping un hap ban khaprip noh ia ki khmat ki jong u bad kam shym poi pyrkhat ba ka jingkhapbrip noh ki khmat ki jong u maieid ka la pynplied ia ki khmat ki jongka.
Ka kong Badariti, ka la pynkynmaw ruh ia ka jingshisha ba ha ka por ba la seng ia ka HSPDP u dur Sing u ba don ha ki lama u dei tang u shap (Symbol) na ka bynta ban ialeh ilekshon hynrei ki nong seng ia ka HSPDP ki la jied ia u shap (Official Logo) jong u Khlieng bad 5 tylli ki khlur bad ka jingjied ia katei ka shap ruh ka don da ka jingmut bad ka la ong ba katkum ka jingiathuh jong u Maieid, la ong ba u Khlieng ha ka shisien na ka 40 snem u ju suh sha jrong na ka bynta ban leit pynthymmai ia la ki jong ki sner ne thapniang bad hadien un sa wan hiar biang katba ki 5 tylli ki khlur pat ki thew ia ka jaitbynriew kumta ka la ong ba kane ka por kaba mynta ia ka party, ba kan kiew sha jrong ban pynthymmai ia ki sner ban wan hiar biang sa shi sien pat khnang ba ka party ha kylleng ka ri Khasi Jaintia kan sa ieng rasong biang.