Pynkhreh ka DCA, ban phah sha ka Sorkar

Shillong, 04 Iaiong:
Ka tnad District Council Affairs (DCA) ka jylla ka dang pynkhreh mynta ban phah sha ka sorkar jylla ban pynlong ia ka elekshon MDC shiteng samoi ha ki konstitwensi ba la iehnoh ki MDC.
Ha ka jingiakren bad u Commissioner & Secretary ka DCA u Bah Jopthiaw Lyngdoh mynta ka sngi, u la ong ba ka tnad ia mynta ka dang pyn khreh ia ki jingdonkam ban phah sha ka sorkar ha kaba iadei bad ka jing pynlong ia ka elekshon MDC shiteng samoi.
“Ha kine ki sngi, ngi dang ia bun kam namar ba dang don ka dorbar mang tyngka bad mynta ngi dang pynlong ia ka jingpynkhreh ia ki jingdonkam ban phah sha ka sorkar jylla”,  u la ong.
Wat la ki seng sain pyrthei ki la pynkhreh pynap lypa ban wan noh shen ka elekshon MDC shiteng samoi ha ki 7 tylli ki konstitwensi, hynrei katkum ka jingtip, ka elekshon ka lah ban long kham katto katne por.
U Bah Lyngdoh u la ong ba  ”Ka ain ka la kdew ba ia ka elekshon MDC shiteng samoi, ym don rule eiei kaba bthah ban pynlong hapoh 6 bnai hynrei kan shong beit ha ka sorkar jylla ban rai ban pynlong ia ka elekshon”.
Kham mynshwa, ka tnad DCA, ka la pyntip sha ka sorkar ia ka jinglait tylli jong ki 7 tylli ki MDC konstitwensi ha ki bnai ba la dep hadien ba la iehnoh ki MDC namar ka jingtieng ioh shah mait ha ka ain Khang Bam Armaloi kaba la pdiang da ka iing dorbar ka jylla ha usnem ba la dep.
Lah ban kdew ha ka 7 tarik Risaw, 2015, u Lat ka jylla u V Shanmuganathan u la ai ia ka jingmynjur ia ka Bill khang bam ar maloi ki MLA ka Prevention of Disqualification (Members of the Legislative Assembly of Meghalaya) Amendment Bill, 2015.
Ka sorkar jylla ka la buh ba kane ka ain kan treikam beit noh naduh ka 1 tarik Risaw kaba mut ka la iaid jan 6 bnai mynta ba la ioh ia ka jingmynjur na u Lat.
Ki MLA kiba long MDC kiba la iehnoh ia ka kam MDC  na ka KHADC ki long Bah HDR Lyngdoh, Bah Ardent Miller Basaiawmoit,Bah Sanbor Shullai, Bah MetbahLyngdoh, Bah HB Nongsiej, Bah KP Pangniang bad Bah Stephanson Mukhim ka JHADC.
Hynrei ka ka daw ka jingpynslem ka sorkar ban pynlong elekshon MDC shiteng samoi, lah ban dei namar ba u Myntri Rangbah uMukul Sangma u dang ap ba u CEM ka KHADC u Bah Pynshngain N Syiem un shah trei shwa ha ka ain lym kumta, kan long ka jingshah rem ia ka sorkar.
Kawei pat, la ong ba ka lah ban dei namar ba ka sorkar jylla ka dang ap ia ka jubab ban ioh na ka Election Commission of India (ECI) ban ai jubab halor ka jingpan jingmut jongka na ka sorkar halor ka kam bat ar kam ki ML/MDC.
Ki 7 ngut ki  MLA kiba long MDC kiba la iehnoh ia ka kam MDC  na ka KHADC ki long Bah HDR Lyngdoh, Bah Ardent Miller Basaiawmoit, Bah Sanbor Shullai, Bah Metbah Lyngdoh, Bah HB Nongsiej, Bah KP Pangniang bad Bah Stephanson Mukhim ka JHADC.