Pynkhreh ka Congress ban ujor sha Kashari pyrshah ia 3 ngut ki MLA

Shillong: Ka Congress ka la pynkhreh ban kiew ïinglieh ïingsaw pyrshah ia ki 3 ngut ki MLA ka party kiba la phet noh sha ka NPP.
Ia kane la iathir ha ka jingialang jong ka party kaba long ha Shillong kaba la wan iashim bynta ki nongialam na ki tnat bapher bapher jong ki konstitwensi.

U president ka MPCC u bah Vincent H Pala u la ong ba ka jingsospen ia ki 2 ngut ki MLA ba kynthup ia u bah Charles Marngar, bad bah Gabriel Wahlang ka dei kaba la leh ka AICC bad na ka MPCC ka shu phah ia ka jingtip.
Lai ngut ki MLA ka Congress kila phet noh sha ka NPP kiba kynthup ia u bah Charles Marngar u MLA ka Mawhati, bah Gabriel Wahlang na Nongstoin bad u Dr. Celestine Lyngdoh u MLA na Umsning.

U bah Pala u la iathuh ba ka party kan iasyllok bad ki stad ain halor kane, bad ka lah ban leit tied jingkhang syndon sha ka Kashari. “Ngin iasyllok bad ki stad ain bad ki nongialam ka AICC, bad ngi lah ban leit sha kashari ruh”, la ong u bah Pala.
U la kynnoh ba ka jingphet ki 3 ngut ki MLA ka Congress ka dei ka buit ka BJP kumba la leh sha kiwei ki jylla, bad hangne ha Meghalaya ka la pyndonkam lyngba ka NPP. “Ka jingiajan paralok ka NPP bad ka BJP ka la nang jur nang khlain mynta, bad ka BJP ka la pyndonkam ia ka NPP ban pyntroin ia ka Congress, bad ka thong jongki, ka long ban pynjah kyrteng syndon ia ka Congress ha ka ri India ruh”, u la ong.