Shillong: Ka BJP Meghalaya ka la pynkhreh ban iakhun ia ka MP na Shillong bad na Tura hadien ba ka jingthmu ban sei kyrtong monlang na ka kynhun MDA ka lah ban nym urlong namar ba ka jur ka jingiaknieh bad ka jingsngewthut hapdeng ka UDP bad ka NPP hadien ba ka NPP ka lah ban sei kyrtong na Shillong ha kane ka MP elekshon. Kine ki ar seng ki dei kiba kham heh ha kane ka sorkar MDA.
Haba kren bad u president ka BJP mynta ka sngi, u bah Shibun Lyngdoh u la ong ba ka BJP ka dang pynkhreh ia ka kam MP kumno ban leh khamtam hadien ba ki ar tylli ki seng kata ka NPP kaba ialam ia ka sorkar bad ka UDP kim don ka jingiasngewthuh jingmut.
“Ngi dang don ha ka jingpynkhreh ia ka MP elekshon namar ba ka MDA kam pat jingialang haduh mynta namar ba ka don ka jingiathut hapdeng ka NPP bad ka UDP”, la ong u bah Shibun.
Katkum ka jingong u bah Shibun, kine ki ar tylli ki party kim pat iapoi sha ka jingmynjur watla ka NPP kam pat pynbna kyrtong, katba ka UDP pat ka la dep pynbna nalor ka HSPDP bad kiwei.
“Ka UDP bad ka NPP ki dei ban don ka jingiasngewthuh jingmut bad lada kim iasngewthuh jingmut kan nym poi sha ka jingthmu ban sei kyrtong monlang na ka MDA”, la ong u bah Shibun.
Ha kajuh ka por, u la ong ba ka BJP ka la long kaba la pynkhreh ban iakhun ia ka MP bad kin sa shong pyrkhat ia kane ka kam.
Kumba ka long mynta ka NPP ka donkam ban ioh MP 4 ngut ha Lok Sabha ba kan ioh ia ka jingithuh kum ka national party bad kane ka dei kawei ka jingeh ba ka NPP kan kyrshan ia ka UDP na Shillong ha kane ka elekshon MP.
Haduh mynta ka NPP kam pat don MP ha Parliament bad ka donkam ban iakhun ban jop MP na ki jylla na kane ka thain mihngi khnang ba kan lah ban pynsawa jur ha Parliament.
Phi don ban ong eiei?