Shillong, 13 Naiwieng:
Ka HYC Ri-Bhoi ryngkat ka Raid Nongtung Circle ki la kynnoh ba ka sorkar Assam mynta ka la sdang ban ban klun jaka ha u pud u sam ka Meghalaya bad dang ha u bnai ba la dep ha ka 22 tarik u risaw ka sorkar Assam ka la wan jurip na ka bynta ban shna ia ka Police Out post ha Umru kaba hap hapoh ka Raid Nongtung.
Haba ia kren bad ki nongthohkhubor u bah Hercules Suting General Secretary HYC Ri-Bhoi u la ong ba ka HYC ka la leit ban ai jingthoh sha u myntri rangbah ka jylla u Dr.Mukul Sangma kumjuh sha u CEM ka KHADC ban pynpaw ia ka jingpyrshah halor katei ka jingthmu ka sorkar Assam. U la kynnoh ba ka daw ka jingnud ka sorkar Assam ka dei ka jingsngap mynthi jong ka sorkar jylla ka bym shym la leh eiei ban pyni ia ka jinglong trai jong ka ha katei ka thaiñ. Haba pynpaw ia ka jinglong trai ka Meghalaya u bah Hercules u la ong ba katei ka jaka ka dei ruh kaba ka sorkar jylla ka ju pynlong tamasa Amur Falcon.
Ka HYC ka la pynrem jur ruh ia u Gau Bura ki Nepali ha katei ka shnong ha kaba u bah Hercules u la ong ba dei utei u Gau Bura ki Nepali uba ju ai khubor sha ka sorkar Assam ia ka jinglong jingman ha katei ka shnong bad dei ma u ruh uba la ai NOC bad ai jingbit na ka bynta ba ka sorkar Assam kan wan shna Police Out post.