Pynkhlain shuh ka sorkar ia ka MMPO, ban ngat kiba iakhih ILP

Shillong, 3 Risaw:
Ha ka por ba ka jylla ka dang thnem ban dawa ia ka jingiakhih ia ka Inner Line Permit (ILP), ka sorkar mynta ka sngi ka la pyn khlain shuh shuh ia ka ain ‘Meghalaya Maintenance of Public Order (MMPO) Assam Act 1947 ban pynngat ia ki nongiakhih ia ka ILP.
Kane ka jingpynkhlain da kaba bsuh shuh shuh ia ki kyndon ha kane ka ain ka long kaba donkam namar ba ki kynhun sengbhalang ha ka jylla ki dang pynlong ia ka jingiakhih ban dawa ia ka ILP da kaba khot ia ka pakhang shnong, pakhang ophis ban pynbor ia ka sorkar ba kan pyntreikam ia ka ILP.
Haba kren hadien ba la wai ka jingialang jong ka kynhun myntri hyne ka sngi, u Symbud Myntri Rangbah ka jylla ba peit ia ka kam ain, u Bah Rowell Lyngdoh u la iathuh ba ka kynhun myntri ka la rai ban bsuh shuh sa ar tylli ki kyndon ka 6 (b) bad ka 6 (c) na kaba don lypa ka 6 (a) jong ka MMPO Act.
Hadien kane, u Myntri Rangbah u Mukul Sangma u la ong ba kane ka ain ka donkam ban pynkhlain ha ka rukom treikam.
“Ka jingbsuh shuh ia kine ki ar tylli ki kyndon 6 (b) bad (c) la khmih lynti ba ka ain kan khlam khlain ha ka jingtreikam jongka bad ruh kan ai bor ia kiba pyntreikam ia ka” la ong u Mukul bad bynrap ba ka jingpynkylla ia kane ka ain la leh katkum ka jingrai jong ka kashari Supreme Court bad ka High Court kaba mana ban pynlong pakhang shnong, pakhang ophis bad kiwei kiwei ki jait jingiakhih.