Pynkhlain ka sorkar ia ki khynnah, ha ka saian & jingkhein

Shillong, 19 Nailur:
Ka sorkar ka la thmu ban pynkhlain ia ka jingbang jong ki khynnah ha ka sobjek Saian bad Jingkhein bad na ka bynta kane, ka la pynlong ia ka jingai jinghikai ia ki nonghikai ba kin ai ia ka jinghikai kaba paka ia ki khynnah naduh ka klas primary haduh secondary.
Ka jingai jinghikai kaba san sngi lynter na ka bynta kane ka phang, la pynkut ha North East Regional Institute of Education (NERIE) ha Umiam ha kane ka sngi Thoh dieng. Ia kane ka prokram ai jinghikai la pynlong da ka RMSA-SEMAM, ka sorkar Meghalaya bad ka NERIE.
U secretary ka tnad pule puthi ka jylla u Bah FR Kharkongor ha ka jingkren jongu ha kane ka sngi, u la maitphang ia ka jingdonkam ban pynkhlain ia kine ki ar tylli ki sobjek bad kumno ka tnad ka la shim khia ban ai ia ka jinghikai ia ki nonghikai ban long kiba tbit ha kine ki sobjek.
U la ong ba katkum ka jinglap jong ka National Achievement Survey (NAS), ka la iaroh ia ka jylla Meghalaya kaba la kloi ban shim ia kane ka sien jam ban pynrung ia ka jinghikai ha kine ki ar tylli ki sobjek ia ki khynnah naduh ba ki dang rit. U la ong ba donkam ban bet ia u symbai ba bha ban ai ia ka jinghikai ha kine ki sobjek ia ki khynnah skul khnang ba kin sngew tynnad ban shim ynda ki la kiew sha ka kyrdan ba kham shalor ruh ha ka jylla.
U la kyntu ia ki nonghikai skul ban ai ia ka jinghikai kaba bang bad kaba kmen ia ki khynnah khnang ba kin sngew tynnad ban pynleit jingmut ia kine ki ar tylli ki sobjek ha ki kamra klas bad shabar ruh.
Katba u Prof MK Mishra u la kdew ia ka jingdonkam jong ka sobjek saian bad jingkhein da kaba ong ba donkam ban aiti khambun ka jinghikai ha kine ki sobjek da kaba pynkylla ia ki rukom hikai ba mynshwa.
Ki dkhot ka Directorate jong ka Educational Research and Training (DERT), DIETs bad ki nonghikai skul na kylleng ki jaka ki la iashim bynta ha kane ka jingai jinghikai kaba san sngi.
Ha kane ka sngi, u Bah Kharkongor u la pynlait paidbah ruh ia Heritage Kit ba ka shna da ka RMSA, ka sorkar Meghalaya.
Ka jingthmu jong kine ki tiar ka long ban pynlong ia ki khynnah ban kheinkor ia ki jinglong ba kyrpang ka jylla, ka kolshor jong ka jylla Meghalaya. Ia kine ki tiar yn sam pat sha ki khynnah.