Nongpoh: Ki la don da ki phew tylli ki kali ha Ri Bhoi, ki la shah bat noh ha ki Pulit ka Ri Bhoi, kata hadien ba ki la pynkhein ia ka Curfew bad kiba la iaid surok ha ki kynta ba la pynjari Curfew da ka District Magistrate ka Ri Bhoi, kaba la pynjari naduh hynnin ka miet 24 tarik kata naduh ka por 12 baje bad kata ka long kum shibynta ban tehlakam ia ka jingmih surok ki paidbah bad ha kajuh ruh ka por ban tehlakam ia ka jingsaphriang jong u khniang jingpan Corona Virus (COVID-19).
Ka jingteh pyrkhing ia ki kali kiba iaid ban ieng hapoh ka surokbah NH-6 ha Ri Bhoi, ka la long kaba pyrkhing haduh katta katta, namar la bat lut ia baroh ki kali, laitnoh tang ia kito ki kali kiba don ia ki kam kiba ym lah ban kiar bad kiba kit ia kiba pang ba shitom, hynrei na bynta jong kito ki briew kiba shait ba khlain bad kiba don ia ki kam kiba ym da kyrkieh eh, ki bor District ka Ri Bhoi, ki la phah ia ki ba kin leit shim ia ki Curfew Pass na ophis ka Deputy Commissioner kaba don ha Nongpoh. Lah ruh ban kdew hangne, ba ka sorkar jylla ka la khot pakhang shnong haduh 5 sngi kata naduh ka 24 tarik u Lber haduh ka 29 u Lber, 2020 bad la pynlait tang ha ka 26 tarik u Lber bad na ka liang u Myntri Rangbah ka ri, u Narendra Modi ruh u la pynjari ban khang ha baroh ka ri kata haduh 21 sngi, kaba dei hi ka jingshim khia ki bor sorkar kumno ban iada na ka jingpur sted u khniang jingpang ba la tip kum u Coronavirus lane u COVID-19. Ka Kong R.M Kurbah, Deputy Commissioner ka Ri Bhoi District, ka la ong ba kum ka bor District ka dang kyrpad jur ia ki paidbah ban kin ai kata ka jingiatrei lang bad ki bor sorkar na ka bynta ban iada na ka jingpur sted une u khniang jingpang bad na ka liang ka bor District ruh ka la shim khia kumba la btah da ka sorkar ban thaw ia ki lad jingiada, na ka bynta ka bha ka miat jong ki paidbha ym tang ha Ri Bhoi, hynrei ha jylla hi baroh kawei. Katei ka khlieh jong ka Ri Bhoi, ka la iathuh ruh ba ba na ka liang ka bor District ka la shimkhia ha ka ban tehlakam ia kito ki briew kiba wan na shabar ka jylla bad ha kajuh ruh ka por ka la kyntu ia kiba kum kitei ki briew ba ki dei ban test shuwa ialade ne ban register ia lade lyngba ka Online website ba la buh da ka sorkar Meghalayaonline.gov.in/covid bad haduh mynta ki la bun, ki briew kiba la sngewthuh bad kiba la wan register ialade ha katei website bad na ka liang ka Medical surveillance committee kan suk ban buddien bad ruh ban pynshai katkum ki kyndon ba ki de ban leh hadien ba ki la wan rung sha ka jylla na ki jylla ne ki ri ba shabar. Shuh shuh ka Kong RM Kurbah, ka la ong ruh halor kane ka pakhang shnong ka sorkar jylla bad wat ka sorkar pdeng, ba la mana ia ki briew ba ki dei ban shong ha la ki ing ki sem, kumta na ka liang ka bor District ruh, ka la shim khia ban tehlakam da kaba btah ban kem ne bat ia kito kiba mih shabar ne wat ki kali paidbah kiba khlem da ioh bor na ka sorkar.
Nalorkata, ka Kong R.M Kurbah ka la pyntip ruh wat ha kaba ia dei bad ki maram mardih ruh lyngba ka tnad supply la shim khia bad ka jingbhah ia ki marbam lyngba ka PDC la dep pynlait haduh u bnai Lber sha baroh ki shnong ki thaw ha ka District lyngba ki Wholesaler ne Dealer bad ia kaba sah pat ka bor District kan dang shim khia shuh shuh nangne shakhmat.
Kumta, na ka liang ka Kong RM Kurbah, kum ka DC ha Ri Bhoi, ka la pyntip ba lada don kino kino ki kam ba kyrkieh bad kiba ym lah ban kiar kaba dei ka kam iap kam im jong ki paidbah, ki paidbah lada ki donkam ki lah ruh ban phone ha kine ki herlpline number 1077 lane ha u number 03638232028.
Phi don ban ong eiei?