Nongstoiñ: U kyrtong jong ka seng Hill State People Democratic Party (HSPDP), u bah D. Jyndiang u ba dei ruh u sitting MLA ka Nongstoiñ Konstitwensi hynnin ka sngi u la pynkhein ia ka ain jong ka Election Commission jong ka ri India kata ka Model Code of Conduct.
Katei ka jingpyn-khein jong u tei u kyrtong ia katei ka ain jong ka EC, ka dei hadien ba u la leit ban iashim bynta bad ai jingkren ha ka jingialang plie ia u maw nongrim jong ka Hostel jong ka Umyiap District ka ba la long hapoh ka shnong Tiehsaw.
U Ma Vincent H Pala MP bad U bah D. Jyndiang kyrtong ka HSPDP ka Nongstoin ha ka jingialang plie ia u maw nongrim ha Tiehsaw:Rupang
Ym tang u Bah Diosstarness Jyndiang, uba la pynkhein ia katei ka model code of conduct, hynrei wat u MP jong ka Shillong Parliamentary Seat u Bah Vincent H Pala ruh u la pynkhein, namar u la long kum u kongsan ha katei ka jingplie ia utei u maw nongrim.
Haba kren ha katei ka jingialang kum u kongsan u ma Vincent H Pala u la kam ruh ba u la pynkhein ia ka Model Code of Conduct, hynrei namar ka dei ka kam jong ka Balang um shymla khein eiei.
Mar ia ioh jingtip halor katei ka khubor na kaliang jong u District Election Officer u la pyrshang ban wad bniah la ka long kaba shisha ne em bad hadien ka jingwad bniah u DEO u la iathuh ba na ka liang jong u Sector Officer u la dep ban phah iaka Report ha kaba iadei bad katei ka bynta ha ryngkat ki dur bad ki jingpynshisha kiba biang.
U la iathuh ruh ba nakaliang jong u Returning Ohisar jong ka 32-Nongstoin un sa phah iaki notices sha ki nongialam jong ka party kaba donkti ha katei ka jingpynkhein ia katei ka model code of Conduct bad lada lap shisha ba u tei u kyrtong u don ha katei ka jingialang ne u pynkhein ia katei ka rai jong ka Election Commission of India na ka liang jong ka Commission kan sa leh ia kaba donkam.