Pynkha tnad ka HANM sha Madanbitaw

Shillong, 14 Iaiong:
Ka HANM Women Wing ka la pyniar ia ka tnad treikam jong ka da kaba pynkha sa iawei ka tnad treikam ba thymmai kaba la tip kum ka HANM Women Wing’s Madan bitaw Circle. Ha katei ka sngi la donlang u President rangbah katei ka seng u bah Lamphrang Khar bani, ka President ka Women wing ka kong Bety Jyrwa bad la la pynskhem ia ki nongkit kam katei ka tnad thym mai da ka secretary kong B.Sungoh.
La jied ia ka kong Edilin Marbaniang kum ka President, Vice President kong Sofia Mary Ranee, Secretary kong Mirtiya Shabong, Finance Secretary kong Khinela Shabong bad u nongai buit ai bor la jied ia u bah J.Warjri, ki don haduh 68 ngut ki dkhot katei ka seng.
Haba kren ha katei ka jingialang, u bah Lamphrang Kharbani u la ong ba ki longkmie Khasi ki dei ban long ki nongsumar bad nongiada ia ka akor ka burom jong ka ri bad ka jaitbynriew, u la pynpaw ba katei ka seng ka ieng ha ka nongrim ban weng noh ia ki saikhum saiteh jong ka jyrsih kaba la rung ha ki rympei ing jong ka bri u hynniewtrep. La sneng bad kyntu kynpham da ka kong Bety Jyrwa ia ki dkhot jong ka seng.
Ka kong Sungoh ka la ong ba ki longkmie ki dei ban bat ia ka riti ka dustur jong ka jaitbynriew, la ka dei ha ka riam ka beit, ka ktien ka thylliej, ka iaid ka ieng bad ka akor ka burom. Ha katei ka sngi la donlang ruh ki bor shnong jong katei ka shnong.