Bah RM Shabong
Ka sorkar Jylla, ha ki khyndiat sngi ba ladep, ka pynbna, ba la shah ia ki nongrep ba kin ia die noh ia u kwai, ka sla tyrpad, u synsar nangne shakhmat bad kitei ki mar, ha ka jing shisha, ki la dei ban iaid bun bha ha iew ha hat, ha kine ki sngi; hynrei na ka jingkhang shnong noh, kumta ki la shu sahkut sbak ha kti jong ki nongrep bad katei ka la buh ia ka jingeh kaba khraw ia ki nongrep jong ka thain riwar lane ri bhoi, kiba ju im ia katei ka rep.
U myntri rangbah, (uba la tuklar lut ia baroh ki sobjek jong ki myntri jongu) ha ki khyndiat sngi ba ladep, ula pyntip ba la shah ia ki nongrep, ba kin ia die ia ki mar rep jongki sha iew; hynrei hadien ba la pynmih ia katei ka hukum, la lap pynban (da ki nongrep), ba katei ka dei tang ka kyntien pyllait jynhaw, namar ba haduh mynta, kim lah ban sdang ia la ka jong ka kam bad ka daw, ka long ba kim lah ban leit die ia la ki jong ki mar, sha ki nongthied kiba don ha Shillong bad sha kiwei de ki jaka.
Ban shu pyrkhat, sngew kumba ka long kaba suk, ban leit die ia u kwai, u synsar, u sla tyrpad, la kumba kheit tyrso na kper bad sa leit die ha surok, ki la bun kiba wan ia knieh; hynrei ngi hap ban tip shai, ba ki nongthied ia u kwai, ki don ki mahajon ha Iewduh bad kitei kin nym pat kwah kwai bun, namar ba ki kudam jongki, ki dang khang haduh mynta, namar ba ka iewduh ka khang bad lait nangta, lada iakren ia u synsar bad u sla tyrpad, ngi tip shai, ba kiba pyniaid ia kitei ki mar, ki dei ki katto katne ngut ki kharkaia bad ia ka dor jong kitei ki mar haneng, ym ju don sorkar ba lah ban tuklar bad kumta, lada ha ka por suk pyrthei ruh, ym don ba nud ban mushlia, kumta sa mynta lei, kat kane ka kordit, ngin hap ban sngewthuh ba ym don mahajon, u ban shu bret kai ia ka pisa jongu, khlem da thikna, lano ba un ioh biang, lem bad ka jing iohnong, kaba u sngew biang ialade.
Lada kane ka sorkar, ka sngew lem ia u nongrep, ka la dei namarkata ban thied lut ia ki mar rep baroh bad hadien kata, kan sa pyniaid dalade kat shaba ka sngewbit; lymda kumta, kitei ki jingkren, kin shu long tang ki ktien pyllait jynhaw suda.
Ngi tip shai ruh ba ka sorkar, kam lah ban leh sbun mynsiem, da ka san kilo u khaw, lane T.700 shi taiew bad kumta ka dei ban ailad noh ba kin ia sdang ia trei ia ktah, lem bad ki kyndon kiba hikai ba kin kiar na ka jingpang corona.
Em kam pat long ban pyllait ia ka lockdown namar ympat ioh report iabaroh kiba la leh test coronavirus, ka sorkar ka hap ban bahkhlieh iaka bai bylla ki paitbah khnang ban lait naka iapthngan bad iapkhlam, ngim dei ban angspah hakum kane ka por.