Pynjur pahara ki pulit, na ka rakhe sngi Laitluid

Shillong, 11 Nailar: 
Ki pulit ki la pynjur bha ia ka jingkhynra kali
ha ka nongbah kum shi bynta ban khang ioh don ki riew runar kiba thmu ban pynthut ia ka jingiaid beit ka jingrakhe sngi Laitluid ka India ha ka 15 tarik mynta u bnai Nailar.
La iohi ba ha man ki jaka ka nongbah kum ka thain Bivar Road, 7Mer, thain Mawlai ki pulit ki la pynlong ia ka jingkhynra ia ki kali ar shaka, saw shaka.
Kane ka jingkhynra ka long ka rukom ba ki pulit ki ju leh man u snem ban pynthikna ba ka jingrakhe laitluid kan iaid beit.
Kumba ju long ha kane ka sngi, ki seng lehnoh bapher bapher ha kane ka thain Mihngi ka India ki ju khot pynlong ia ka jingkhot pakhangshnong wat ha kane ka jylla Meghalaya ruh.
Haba iaid kylleng ka nongbah Shillong, la iohi ba ki pulit kaMeghalaya bad ki CRPF ki la pynieng kali ha man ki dong ka Sor badpeit ia ki kali da kaba phah khyllied ia ki bonet, peit ia ki tum kitam.
Ha kajuh ka por, ka sorkar ka la bynshet ha ki myntri badParliamentary secretaries ban pynher lama ha kane ka sngi.
U Symbud Myntri Rangbah, Bah Rowell Lyngdoh un pynher lama ha Amalem, u Dr. R. C. Laloo ha Mawkyrwat, u Bah H. D.R. Lyngdoh ha Resubelpara; Bah Prestone Tynsong ha Williamnagar, ka Deborah C. Marak ha Jowai,u Bah  A. L. Hek ha Ampati, u Zenith Sangma ha Tura, Kong Roshan Warjri ha Nongpoh, Kong M. Ampareen Lyngdoh ha Baghmara bad u Bah Sniewbhalang Dhar ha Nongstoin.
U Parliamentary Secretary Bah Kennedy Cornelius Khyriem ha Mairang, Bah P N Syiem ha Sohra, u Rubinus Syngkon ha Patharkhmah,  u Coming One Ymbon ha Shangpung bad u Bah David Nongrum  ha Mawshynrut.
Halor kane, ka sorkar ka la ibthah ia baroh ki Deputy Commissioner bad ki Sub-Divisional Officers ban iawer ia ki paidbah ban leit sha kane ka jingrakhe. Ka sorkar ka rai ruh baroh ki Block kin rakhe ia ka sngi Laitluid ryngkat ka jingiatreilang bad ki MLA jong ka thain.