Shillong: Hadien ka jingiather kuli hapdeng uwei u suba lehnoh bad ki pulit kaba la jia ha ka sngi ba ar kata ka 14 tarik u bnai Nailur 2021 hajan ka Sherwood School kaba don hajan Tura bad ha katei ka jingiather kuli bad ki pulit utei u suba lehnoh u la kyllon iap noh ha katei ka jaka.
Haba kren sha ki lad pathai khubor ha ka 15 tarik u bnai Nailur 2021, u Myntri Rangbah ka jylla u Conrad K Sangma u la ong hadien ba la ioh jingtip na ka tnad syntiat ia ka iaid ka ieng ki dkhot jong ki seng lehnoh, kumta na ka liang ka Sorkar ka la pynkhlaiñ ia ki bor pahara bad ka jingtalasi ha baroh ki distrik jong ka jylla. U Conrad K Sangma u la ong ruh ba um kwah ban kynnoh ba ki dei na ki seng lehnoh aiu khlem da ioh ia ka jingtip kaba bniah.
Ha ka 15 tarik u bnai Nailur 2021, u Dr Mukul Sangma u ba dei u nongialam jong ka liang pyrshah hapoh ka ïingdorbar thawaiñ, u la ong ba ki la don ki dkhot jong ka seng NDFB kiba la iaid la ieng ha ki thaiñ jong ka Garo Hills bad ha West Khasi Hills ha ryngkat bad kiwei ki samla kiba iaid lang bad ki.
Ha kaba iadei bad ka jingkynnoh ka liang pyrshah ba ka Sorkar MDA kam shim khia bad kam shim lah leh eiei satia halor kane, na ka liang u Conrad K Sangma u la ong ba ka Sorkar hi ka khlem kheiñ sting halor kane hynrei ka Sorkar ryngkat bad ka tnad pulit ki la peit bniah bha halor kane bad haba ki ioh jingtip eiei la ka long na ka liang pyrshah ne na ki paidbah, ka dei ka kamram jong ka Sorkar ban leh eiei kumba ka ju leh beit man ka por.
Phi don ban ong eiei?