Pynjop ia ka Kong Rona Khyndeit, phin sa iohi ki kam pynroi ha Nongpoh Constituency, ong u Bah Prestone Tynsong

Nongpoh, 05 K’lyngkot: U Bah Prestone Tynsong, President ka NPP ha ka jylla bad uba dei ruh u Symbud Myntri Rangbah ka sorkar jylla, mynta ka sngi, u la hiar sha artylli ki thaiñ kiba hap ha Nongpoh Constituency bad kata ka long na bynta ban leit ialap Ilekshon ia ka Kong Rona Khyndeit, Kyrtong MDC ka NPP na Nongpoh Constituency.

Lyngba jong katei ka sngi ialap Ilekshon na bynta ka Kong Rona Khyndeit, u Bah Prestone Tynsong, nyngkong u la hiar sha Marmain bad hadien kata pat la pynlong ia ka jingialang paidbah ha shnong Umwang, Marngar.

Ha katei ka sngi, ba u Bah Prestone Tynsong, u la leit ban ialap Ilekshon na bynta ka Kyrtong MDC ka NPP Nongpoh Constituency, la synran da ki heh nongialam ka NPP, kiba kynthup ia u Bah Himalaya Shangpliang, Nongaiktien ka NPP ha ka jylla, u Bah Clement Mawlong, President ka NPP Ri Bhoi lem bad kiwei ki nongialam ka NPP.

Haba ai jingkren sha ki paidbah ha Umwang, u Bah Prestone Tynsong, u la kyntu ia ki paidbah kiba la leit sha katei ka jingialang, ba ha kane ka kynti kaba mynta, ba kin ai ka jingkyrshan kaba pura ia ka Kong Rona Khyndeit, khnang ba kan poi sha ka thong jong ka jingjop ha kane ka Ilekshon MDC ka ban sa long shen.

“Jied bad pynjop ia ka Kong Rona Khyndeit ha kane ka Ilekshon MDC, khnang ba phin suk ha ka rukom treikam bad ba ki kam pynroi kin shlei ha Nongpoh Constituency, namar lyngba ka Kong Rona Khymdeit na ka NPP, yn suk ka rukom treikam, kata na Nongpoh beit beit shaduh Secretariat” ong u Bah Prestone Tynsong.

Nalorkata, ba ka Kong Rona Khymdeit, ka dei ka longkmie kaba la ih bha ha ka rta jong ki kam Politik bad nalorkata ka dei ruh ka longkmie kaba la tbit bha ha ka jingpule bad ha ki bynta jong ki kyndon ain bapher bapher.