Pynjlan ia ka khang shnong, haduh 31 tarik ha ka Jylla, ym pat shah ia rung iamih hapdeng ki jylla

Shillong:U symbud myntri rang bah ka jylla u bah Prestone Tyngsong u la ong, hadien ba ka sorkar pdeng ka la pynbna ia ka jing pynjlan ia ka Lockdown ha baroh kawei ka Ri India.

Ka sorkar jylla ruh ka la rai ba kan pynjlan shuh ia ka pakhang shnong, ha ka jylla haduh ka 31 tarik u Jymmang 2020. Halor ka jingshah jong ka Ministry of Home Affair jong ka sorkar pdeng ia ka iarung ia mih na kawei ka jylla sha kawei (inter state movement); na ka liang u bah Prestone u la ong ba ha ka jylla Meghalaya yn ym pat shah ia ka iarung ia mih na ka wei ka jylla sha kawei pat.

U la iathuh ruh ba ki kali ki ba lah ban wan ha ka jylla Meghalaya kin long tang ki kali ki ba wan kit ia ki mar bam sha kane ka jylla bad kine ki kali kin hap bud pyrkhing ia ka jingbthah jong ka tnad ka koit ka khiah.