Pynjlan biang ka sorkar ia ka GHADC, yn synshar U Administrator

Shillong, 03  Nailar:  
Ka sorkar jylla sa shisien biang ka la rai ban pynjlan por shuh ia ka Garo Hills Autonomous District Council (GHA DC) bad ha kane ka kynti ka la pynjari da ka jing synshar jong u Administrator. Ia kane ka jingtyr wa ka sorkar, la ioh ruh ia ka jingpdiang na u Lat ka jylla.
Ka jingialang jong ka kynhun myntri kaba long mynta ka sngi, ka la shim ia kane ka rai bad da kane kan plie na ka bynta ban pynlong noh ia ka elekshon sha kane ka Council kaba la pynjlan haduh lai sien kham mynshwa.
Haba kren hadien ba la wai ka jingialang u Myntri ka tnad District Council Affairs u Bah HDR Lyngdoh u la ong ba namar ba ia ka elekshon jong ka GHADC ym lah ban pynlong ha ka por ba la kut ha ka 17 tarik Nailar 205, la donkam ban pynjlan noh shwa ia ka por sa ar bnai ban aiti ha ka synshar Administrator naduh ka 18 tarik Nailar haduh  21 tarik Risaw. Ka kynhun myntri ka la bthah ia u Deputy Commissioner ka West Garo Hills kum uAdministrator  ka GHADC.
U Bah Lyngdoh u la ong ba ka tnad ka la pynkhreh ban pynlong ia ka elekshon hapoh ka 17 tarik Nailar, hynrei namar ka jingwan noh ka elekshon shiteng samoi ha Chokpot, ka la hap ban pynsangeh noh shwa.
Ia ka elekshon sha ka GHADC yn sa pynbna shen da ka sorkar, u la ong.
Kham mynshwa, ka sorkar ka la rai ban pynjlan ia ka por jong ka GHADC lai sien ban pynurlong ia ka jingthmu ka sorkar pdeng ban pynkylla ia ka 6th Scheduled hadien ba la iasoi ia ka jingiateh bad ka ANVC hynrei kane kam long kam haba ka sorkar pdeng kam patiaw ia ka jingkyrpad ka sorkar jylla.
La iathuh ba ka sorkar pdeng ka la ong ba ka jingthmu ban pynkylla ia ka 6th Scheduled kan sa shim por bad namar kane, ka sorkar jylla ka la iakynduh jingeh ban iai ap bad kam banse ban pynlong pynjari synshar administrator noh sa ar bnai bad hadien kane, kan sa pynlong ia ka elekshon. Ha kane ka jingialang ka kynhun myntri, la mynjur ruh ia ka  Judicial Service Rules, MBOSE Service Regulation bad ka MBOSE Conduct Regulation, 2015.