Pynjlan biang ïa ka jingkhangdam ïa ka jylla, kyntu u Lamphang ïa u MR

Shillong: U Lamphang ka Ïing Dorbar Thaw-aiñ ka Jylla, bah Metbah Lyngdoh u la kyntu jur ïa u Myntri Rangbah ka Jylla, u Conrad K Sangma ban pynjlan biang ïa ka jingkhang dam ïa ka jylla haduh ban da kut bnai da kaba kdew ba ka jingdon kiba ïoh ïa u khñiang COVID -19 ka la nang kiew ha ka ri.

Ha ka shithi sha u Myntri Rangbah kaba u phah ha ka miet jong ka sngi Palei, u Lamphang u la ai bun ki jingmut kiba dei ki lad jingïada kiban ïarap ïa ka Meghalaya ba kan lait na ka jingsaphriang jong katei ka khlam ba kaba kawei na kitei ki lad ka long ban bteng biang ïa ka jingkhangdam ïa ka jylla haduh ban da kut une u bnai.

Da kaba pynshong nongrim bha, na ka liang u Lamphang u la ai jingmut ba ïa mynta shipor dei ban khang shwa ïa ki ïew kiba kham heh ha ka jylla kum ha nongbah Shillong, Jowai, ïew Tura bad kiwei kiwei.

“Dei ban shah shwa tang ïa kito ki ïew shnong kiba rit ban plie namar ïa kitei dang lah ban teh lakam ïa ka jingïalum briew,” u la ong.

Ha kajuh ka por u kyntu ruh ïa ka sorkar jylla ba kan khangdam shwa shipor ïa baroh ki ïew kiba don ha ki khappud jong ki jylla kynthup bad kito ki ïew kiba don ha khappud bad ki ri ba marjan.

“Baroh ki jaka rung jaka mih jong ka jylla la ka long kiba pyniasoh bad kiwei ki jylla ne bad ka Ri dei ban khang shwa bad dei ruh ban teh kyndon ïa ka leit ka wan na kawei ka distrik sha kawei pat,” u la bynrap biang.

Da kaba ai jingmut pat halor ka leit ka wan jong ki kali shimet, u Bah Metbah u la ai jingmut ba dei ban shah ïaid da ka odd-even system.

U la kyntu ruh ïa u Myntri Rangbah ban ai jingmut ïa ka sorkar India ban pynsangeh shwa ïa ka leit ka wan jong ki bor pahara ka sorkar pdeng sha ka jylla ïa mynta shi por.

Nalorkata, u la banjur ruh halor ka jingdonkam ban synreit dawai ïa baroh ki kali kiba wan ban kit ia ki marbam mardih ha ki khyrdop hashuwa ba kin rung sha poh ka jylla.

U Lamphang u la kyntu ruh ïa u Myntri Rangbah ban wad lad shuh na ka bynta ban kit ïa ki mar rep jong ki paidbah ka jylla nalor ka kynhun kaba la don lypa, ka 1917 iTEAMS.

Shuh shuh, u kyntu jur ruh ba donkam ka jingpeitngor kaba jur halor ki dor ki mur jong ki marbam mardih khamtam u khaw bad u dai bad kiwei kiwei ha ka jylla.