Pynjari korphiw ka sorkar Bihar, namar ka jingshit tasam ha ka Jylla

New Delhi: Ka sorkar Bihar, ka la pynbna da ka kyndon 144 Cr PC ha Gaya jongka Bihar bad ka daw, ka long hadien ba 40ngut ki briew ki la iap ei bad sa da ki phew ngut ki la kem pang, namar ka jingshit tasam ha katei ka nongbah. Katei ka hukum, ka maham ban ialum lang palat san ngut ki briew ha kano kano ka jaka, ha katei ka nongbah.
Ka jingshit ha Bihar, ka la kiew sha palat 45 degree ha kine ki bun bun sngi ba ladep. Ki bor sorkar ha Gaya, ki la pyntrei kam, da ka kyndon, kaba long kum ka korphiw, ha kaba la khang ia ki paidbah ba kin mih na iing ban trei kam shabar bad la khang ruh ban trei jingtrei hapdeng ka por 11baje mynstep haduh 4 baje nohsngi.
Kat haduh mynta ki don 76ngut ki briew kiba la iap ha ki lai tylli ki District jong ka Bihar, na katei ka jingshit kaba tasam bad katei ka la pynlong ia ka sorkar Jylla, ba kan khang ia ki skul haduh ka 22tarik Jylliew.
Na ka liang ka tnat Disaster Management Department, ka iathuh ba 33ngut ki briew ki la iap ha Aurangabad, 31 ha Gaya bad 12ngut ha Nawada, na katei ka jingshit tasam.
Ka tnat peit mariang, ka iathuh ba ha ka 15tarik Jylliew, ka jingshit ka poi sha ka 45.8 degree ha ka nongbah Patna bad kaba dei ka jingshit kaba jubor tam ha kine ki 10snem ba ladep.