Nongpoh, 09 Nohprah: Ka la pynkmen eh ia ki paidbah nongshong shnong ha Maikhuli bad Pillangkata, ki shnong kiba hap ha Jirang Constituency bad kiba don ha syndah eh bad ka jylla Assam, ha kaba mynta ka sngi u Bah Sosthenes Sohtun, MLA Jirang, u la leit ban plie paidbah ia artylli ki skul, kiba u la pynioh kyrpang hapoh kitei ki shnong.
Lyngba jong katei ka sngi, u MLA Jirang, u la leit ban plie nyngkong ia ka building jong ka skul Pillangkata Govt. LP School, ha kaba la shna bha bad kaba la shna ha ka jingpynmang tyngkata kaba la kot sha ka T. 50 lak tam, kata kiba kynthup naduh ki ben, ki desk bad ki jaka leit shabar jong ki khynnah skul.
Kawei pat ka building jong ka skul, ka dei kaba u la pynioh hapoh ka shnong Maikhuli Govt LP School, kaba don ha shnong Maikhuli, ha kaba la shna bha ia katei ka building bad kaba la ioh ia ka jingpynmang tyngkata, kaba la kot sha ka T. 37 lak.
Haba iadei bad katei ka jinglah u MLA Jirang ban pynioh ia kitei ki jingdonkam jong ki paidbah ha ka thain khappud, ki la ai ka jingkhublei kaba kyrpang eh ia u bad kata ka dei hadien ba ki la iohi ba lap, ba u dei shisha uta u nongmihkhmat, uba trei shitom bad uba sngap ia ka jingud jingnam ne ban pynioh ia ki jingdonkam jong ki paidbah.
Katba na ka liang u Bah Sosthenes Sohtun, haba u kren sha ki paidbah, u la ong ba kitei ki jingdonkam jong ki paidbah, ki la urlong ka dei namar ka jingshimkhia ka sorkar bad kaba la pynsngap haba u leit ban pynsngew ia ka jingdonkam ki paidbah.
Namarkata, na ka liang u MLA, u la kyntu ia ki nongpeit nongkhmieh jong katei ka skul, ba ki dei ban sumar bha, khnang ba kitei ki building kaba la plie paidbah mynta ka sngi, ba kin neh slem bad ba kin ai jingmyntoi shisha ia ki paidbah bad khamtam eh ia ki khynnah kiba pule ha kitei ki skul.
La plie paidbah ia kitei ki skul building, da ka jingdon ki briew na ka tnat pule puthi, ki nongialam shnong, ki riew rangbah lem bad paidbah ha kitei ki shnong.
Phi don ban ong eiei?