Pynim biang ki nongknia ia u bah Mit Mawkon, da kaba sei na u Mawshyieng

Tangmang,20 Iaiong:
Ha ka Sngi U Blei ba ladep, U bah Mit Mawkon, ula wan paw ha ka jing long doh, ba u dei u briew, uba im, hynrei mynta ka sngi, u dei uba im ha ka jinglong doh bad uba im ruh ha ka hukum Blei bad ka daw, ka long, namar ba la sei noh ia u, na ka jingiap, kaba long ba la sei noh ia ka shyieng jongu, ba la buh ha u maw shyieng jong ki nongiap, ha ka kur Mawkon, kaba dei ha ka Shnong Tangmang.
Kumta mynta ka dei ka sngi kaba kmen tam ha ka jingim jong ka kmie jongu, ka kong Phrin Mawkon, ha kaba u khun jong ka, uba la jah la 36 snem u bah Mit Mawkon, mynta u la dei u briew, uba im pura ha ka jinglong doh bad kumjuh ha ka jinglong mynsiem, hadien ba la pyndep ia ka knia ka khriam bad ka law ka loit mynta ka sngi ha Lum jingtep shnong ka Tangmang ka jaka ba la tei ia u mawshyieng.
Ia u Mawshyieng jong u Bah Mit la tei ha syndah ka jingtep ki ar ngut ki para shynrang jong u, bad ha utei u mawshyieng la thep ia ki shyieng ki ar ngut ki para jong u kynthup ka kyrteng u bah Mit kum u briew uba la iap.
La law la loit noh ia ka kyrteng u bah Mit na katei ka Mawshyieng da ki jingknia jingkhriam bad ki jingleh niam jong u bah David Lamin, u nongshat nongkhein.
Shuwa ban sdang ka jinglehniam ka kmie u bah Mit ka kong Phrin ka la duwai la pan map hakhmat u Mawshyieng bad ka shim beit ba ka jingbuh Mawshyieng ia u bah Mit ka dei ka jing shah pynsngewthuh bakla.
Hadien ba la dep ka knia ka khriam la lied ia utei u mawshyieng da ki trai kur bad hadien ba la dep ban duwai phirat da u nongkhan bad hadien ba la buh ia ki kait ki ‘la kait ba la dep knia la tap biang da ki trai kur hi, ha katei ka jinglehniam ka la don shipor ka jingiatainia hapdeng u nongknia bad ka ksuid kaba la shong ha ka met u bah Mit, hapdeng katei ka jingiatainia ka ksuid ka la jubab na ka shyntur u bah Mit ba kan mih noh bad ka pan map na baroh ki bahaing hasem jong u.
“Ka ksuid ka la mih, namar mynta u la dei u briew uba im, ka iathuh ba ka shong ha ka met u bah Mit kum u briew uba la iap , ym u ba dang im” iathuh u bah David Lamin, nongknia.
Shuwa ban poi ha ka shnong Tangmang ka la don ruh ka jingiatai nia kaba shipor hapdeng uwei pat u nongsumar u bah Donbor Malngiang bad kata ka ksuid kaba shong ha ka met u bah Mit, bad kaba phylla kaba u nongthohkhubor u la iohi bad ioh sngew ka long ba haba u bah Mit u kren ka sur jong u ka lam sur kynthei bad u kren ruh da ka ktien pnar, “Nga maya skhiat ia utu u khynriam” ki dei ki sur kiba mih na ka shyntur u bah Mit, bad shuh shuh kaba kham phylla ka long ba ha ka por ba kata ka ksuid ka pyndik u kren beit tang da ka ktien pnar, katba hadien ba ka la pyllait -u kynmaw ban kren da ka ktien war.
Ha katei ka law ka loit ia u bah Mit na u mawshyieng la don haduh laingut ki nongknia bad ki nongsumar kiba la sumar ia u , u bah David Lamin, na ka shnong Lamin; hynrei uba la shong la sah noh sha Nongshyrngan, Pynursla, u bah Donbor Malngiang uba la shong la sah sha Mawpyut Jaintia bad iwei i tymmen iba la iarap ia u bah David.
La ia donlang ruh ka kmie u bah Mit, ka kong Phrin, ki para , ki kur ki kha ha u lum jingtep ba la leh ia ka jingleh niam.