Pynim biang ka KJBWA ia ka iew masi barim

Shillong, 20 Nohprah:
Ka Khasi-Jaintia Butchers’ Welfare Association (KJBWA) ka la pynim biang ia ka iew thied masi kaba rim ha Byrnihat hadien ba ka la sangeh noh ban leit thied masi na Khanapara namar ba ka Hima Mylliem bad ka KHADC ka la pyrshah ban ksam shkor ia ki masi kiba wan ha katei ka iew.
Kane ka iew barim kaba ka KJBWA ka kwah ban pynim biang ka dei ha Byrnihat, Rongkona hapoh ka Nongpoh Sirdarship.
U Vice President ka KJBWA u Bah Generous Warlarpih haba kren mynta ka sngi sha ki nongthoh khubor u la ong ba “Ngi la rai ban pynim biang ia ka iew thied masi ha ka Rongkon, Byrnihat hadien ba la pynlong ia ka jingjurip ha katei ka jaka ha kane ka sngi Nyngkong ba la don lang ki heh na ka District Animal Husbandry & Veterinary bad ka tnad Pulit hadien ba la ioh bor na u Deputy Commissioner, Nongpoh.
U la iathuh ba katei ka iew ban pynim biang, yn eksamin shwa da ki doktor shwa ban pynlait sha iew ban ot doh bad yn ksam shkor ruh ia ki masi ban lait na ka jingshalan tuh sha Bangladesh.
Kane ka jingksam shkor ka long ban khang lad ia ka jingthmu ban shalan tuh ia ki masi sha Bangladesh.
U la ong ba ka jingkyntait ka KHADC bad ka hima Mylliem ban ksam skhor ia ki masi, ka don eiei ha lyndet ka jingmut bym hok jongki da ka jingiadonkti lang bad ki nongkhaii tuh. “Ka jingthmu ban khang lad ban ksam skhor ia ki masi ka long ban ioh lad ban khaii tuh ia ki masi bad ban ioh lum khajna beain ka Hima Mylliem”, u la ong.