Pynieng nar elektrik ka Assam ha jaka ka Meghalaya

Shillong,
25 Naiwieng: Ka sor kar Assam kam khein snep ia ki kam pynroi ka sorkar Meghalaya ha ki thain khappud bad kane ka la paw tyng krein ha ka shnong Jambrigang, Nongspung Syiemship ka Jirang C&RD Block, Ri Bhoi District, ka la leit ban pynieng da ki nar dew bilat ban ai bording ia katei ka shnong bad kiwei ki shnong ba marjan.
Kham ha shwa ka sorkar Meghalaya ka la pyntrei ka skhim RGGVY ban ai bording ia katei ka shnong bad kiwei ki shnong ba marjan, hynrei ka Assam kam salia pynieng ha kajuh ka jaka da ki post dewbilat ban ai bording tang ban ioh klun ia ki jaka hadien ba ka la dep ban pyntrei ia ka surok na ka skhim PMGSY.Kumba ka paw kane ka jingleh buit tuh ka Assam ban iarap ia ki shnong khappud ka la jia ruh ha kiwei kiwei ki thain na ka por sha ka por ban shim kabu tang ban ioh klun ia ki jaka, katei ka shkim ai bording ka kong Meghalaya ka la pulom noh hadien ba la pyntreikam ka Assam.Kumba paw ka kam pynbeit pud hapdeng ka Meghalaya-Assam  ka shu kut tang ha miej iakren ki heh sorkar da kaba bat soskular ne ka Status-quo ba ki kam pynroi ha ki shnong khappud dei ban iatip lang shwa ban pyntrei kam katba ka Assam ka leh sop sop da ki kam.La lap ba nalor ka surok, ka bording ka Assam ka la shna ruh  ka top um ban ai umbam umdih ia ki paidbah kaba la pyntrei da ki briew ka tnad PHE jong ka jylla Assam bad pynieng syndon ia ka jingthoh ban pynthikna ba katei ka shnong ka hap hapoh ka Assam.Halor ka jingkylli katto katne ki rangbah ki la iaroh ia u Bah Michel Warjri Secretary ka Hima Nongspung uba ujor sha iing bishar pyrshah ia ka sorkar Assam halor ka jingpyntrei ia ka surok PMGSY.“Lada ka sorkar Meghalaya kam iarap ki shnong kim lah ban leh eiei bad khlem pep kin poi sha Assam,”  la pynpaw kitei ki rangbah namar ka sorkar Assam ka trei da kam pynroi bad ki paidbah kim lah khang ne kyntait namar ki donkam ia ki pynroi.
Ki la ong ka daw ba kongsan ka dei ka jingleh klet ka sorkar Meghalaya ban iarap ia ki shong khappud lyngba ki skhim pynroi jong ki tnad treikam bapher bapher ka sorkar jylla.